खोज

दाङ,२ बैशाख ।

दाङको तुलसीपुर उपमहानगरपालिकाले ज्येष्ठ नागरिकका सम्मानका लागि तीर्थाटन, कपडा त कतै च्यावनप्रास र मह वितरण गर्नेगरेको छ ।

सोही कार्यक्रम अन्तरगर्त  तुलसीपुर उपमहानगरपालिकाले ज्येष्ठ नागरिकलाई मेयर कोशेली कार्यक्रम मार्फत् गाउँ–गाउँमा पुगेर ज्येष्ठ नागरिकलाई कोशेलीबापत मह वितरण सुरु गरेको हो ।

तुलसीपुर उपमहानगरपालिका नगरप्रमुख टीकाराम खड्काले ज्येष्ठ नागरिक भनेका समाजमा देउताजस्तै भएकाले उनीहरूको सम्मानस्वरूप गाउँ–घरमै  पुगेर सन्चो बिसन्चो सोध्ने देखि कोशेलीस्वरूप मह वितरण सुरु गरेको बताए ।

उनले भने , ‘ज्येष्ठ नागरिक समाजका अग्रज अनुभवका पोका हुन् , उनीहरुका लागि सम्मान पनि होस् र स्वास्थ्यका लागि फाइदा पुगोस् भन्ने ध्येय राखेर मह वितरण सुरु गरेका हौँ । नगरप्रमुख खड्काका अनुसार पालिकाले अघिल्लो वर्षमा न्यानो कपडा  वितरणका साथै गाउँ घरमा पुगेर मुटु, मधुमेह, आँखाको शिविर सञ्चालन गर्दैआएको थियो । सोही कार्यक्रमलाइ निरन्तरता दिदै यसपाली पनि कार्यक्रम गरेको बताए ।

तुलसीपुर उपमहानगरपालिका सामाजिक विकास शाखाका प्रमुख माया श्रेष्ठका अनुसार यसवर्ष करिब पाँच सय ज्येष्ठ नागरिकलाई मेयर कोशेली कार्यक्रममार्फत् मह वितरण सुरु गरेको बताइन्  । श्रेष्ठका अनुसार स्थानीय मौरीपालन किसानलाई प्रोत्साहनका साथै विपन्न समुदायका ज्येष्ठ नागरिकलाई गाउँमै पुगेर मह वितरण गरिएको बताइन् ।

तुलसीपुर उपमहानगरपालिका वडा–१९ स्तरीय ज्येष्ठ नागरिक समितिका अध्यक्ष नवराज पार्धेले स्थानीय सरकारले ज्येष्ठ नागरिकका अपेक्षासहित मेयर कोशेली कार्यक्रममार्फत् ज्येष्ठ नागरिकप्रतिको सम्मान व्यक्त भएको बताए  । उनले ज्येष्ठ नागरिकलाई वडा–वडामा दिवा सेवा  केन्द्र स्थापना गरेर मनोरञ्जनको व्यवस्थापन गर्नुपर्ने बताए ।

तुलसीपुर उपमहानगरपालिका वडा १७ का वडाध्यक्ष थलराज पुरीले पहिलो पटक वडाका विपन्न समुदायका २५ जना  ज्येष्ठ नागरिकलाई मेयर कोशेली कार्यक्रम मार्फत प्राप्त भएको मह वितरण गरिएको बताए  ।

आयुर्वेद शास्त्रका अनुसार महले कफ र पित्तलाई सन्तुलनमा राख्दछ भने पाचन शक्तिको वृद्धि, रोग प्रतिरोधात्मक क्षमता बढाउन, कफ नाशक, वजन नियन्त्रण, रक्त शुद्धीकरण गर्दछ भन्ने मान्यता रहेको छ।