खोज

सुर्खेत, २ वैशाख ।

दशौँ राष्ट्रिय खेलकुद प्रतियोगिताको पटक—पटक मिति सार्दा प्रतियोगिताको विषयमा फेरि अन्यौलता छाएको छ । हालसम्म तीनपटक मिति तय गरेता पनि प्रतियोगिता हुने विषयमा अझै अन्यौल देखिन्छ ।

राष्ट्रिय खेलकुद परिषद्ले पहिलोपटक गएको मंसिर २ देखि ९ गतेसम्म गर्ने निर्णय गरेको थियो । त्यसयता पहिलो पटक म्याद थपेर गएको चैत २३ देखि ३० गतेसम्म प्रतियोगिता हुने मिति सारियो ।

पछिल्लो पटक राष्ट्रिय खेलकुद परिषद् (राखेप) को पछिल्लो बोर्ड बैठकले प्रतियोगिताको अर्को मिति तय गरेको थियो । युवा तथा खेलकुदमन्त्री तेजुलाल चौधरीको अध्यक्षतामा बसेको बैठकले प्रतियोगिता २०८२ जेठ ३ देखि १० गतेसम्म गर्ने निर्णय गरेपनि पुनःउक्त मितिमा पनि प्रतियोगिता नहुने भएको छ ।

सरकारले ३ जेठदेखि १० गतेसम्म कर्णाली प्रदेशको राजधानी सुर्खेतमा हुने प्रतियोगिताको तेस्रो मिति घोषणा गरेपनि खेलकुद क्षेत्रका अगुवाहरु प्रतियोगिता हुनेमा विश्वस्त थिएनन् ।

प्रतियोगिताको तयारीको विषयमा निर्णय गर्न बसेको राष्ट्रिय खेलकुद परिषद् (राखेप) को बोर्ड बैठकमा खेलकुदमन्त्री तेजुलाल चौधरीले खेलकुद नहुने घोषणा गरेपछि प्रतियोगिता अनिश्चिततातर्फ धकेलिएको छ । तयारी नपुगेको भन्दै मन्त्री चौधरीले प्रतियोगिता रोकेका हुन् ।

कर्णाली प्रदेशको राजधानी वीरेन्द्रनगरमा आयोजना हुने भनिएको प्रतियोगिताको आयोजक राखेप र व्यवस्थापक प्रदेश खेलकुद विकास परिषद् हुन् । तर सरकारले तोकेको पछिल्लो मितिमा वीरेन्द्रनगरमा अत्यधिक गर्मी हुने तथा मौसम प्रतिकूलताका कारण सो समय उपयुक्त नभएको बताइन्छ ।

संघीय सरकारले चालु आर्थिक वर्षमा प्रतियोगिता सम्पन्न गर्न ६० करोड रूपैयाँ विनियोजन गरेको थियो । गण्डकीको पोखरामा नवाँै राष्ट्रिय खेलकुद समापन हुँदा २०८१ मंसिर २ गतेदेखि ९ गतेको मिति प्रस्ताव गरिएको थियो । पूर्वाधार तयारी अवस्थामा हुँदा समेत सरकारले प्रतियोगिता सञ्चालनमा चासो नदिएको सरोकारवालाको गुनासो छ ।

केही समय अघि कर्णाली प्रदेशका मुख्यमन्त्री यमलाल कँडेलले दशौँ राष्ट्रिय खेलकुद प्रतियोगिताको मिति नसार्न राष्ट्रिय खेलकुद परिषद्लाई आग्रह गरेका थिए । दशौँ राष्ट्रिय खेलकुद प्रतियोगिता मूल आयोजक समितिको काठमाडौंमा सम्पन्न बैठकमा मुख्यमन्त्री कँडेलले पटकपटक मिति सार्ने कामले प्रतियोगितालाई अन्योल बनाउने र जनविश्वास गुम्ने हुँदा अब मिति सार्ने काम नगर्न परिषद्लाई आग्रह गरेका हुन् ।

एक महिनाअघि प्रतियोगिताका लागि मूल आयोजक सचिवालय सञ्चालनमा ल्याइएपछि प्रतियोगिता हुनेमा कर्णालीबासी आशाबादी बनेका थिए । युवा तथा खेलकुदमन्त्री तथा प्रतियोगिता मूल आयोजक समितिका अध्यक्ष चौधरी, कर्णाली प्रदेशका मुख्यमन्त्री एवम् प्रतियोगिता मूल आयोजक समितिका सहअध्यक्ष कँडेलले वीरेन्द्रनगरस्थित कर्णाली प्रदेश रंगशालामा सचिवालयको उद्घाटन गरेका हुन् । उक्त कार्यक्रममा युवा तथा खेलकुदमन्त्री चौधरीले जेठ ३ गतेदेखि तोकिएको दशौँ राष्ट्रिय खेलकुद प्रतियोगिता अब कुनै बहानामा नसर्ने प्रतिवद्धता जनाएका थिए । हाल उनै मन्त्री चौधरीले नै उक्त मितिमा प्रतियोगिता नहुने घोषणा गरेका छन् ।

पहिलो पटक कर्णालीमा हुन लागेको १० औँ राष्ट्रिय खेलकुद प्रतियोगिता समयमै सम्पन्न गरी इतिहास रच्नुका साथै जस लिने मौका कर्णालीले गुमाएको छ । तोकिएको पहिलो खेलकुद मितिमै खेल सम्पन्न गर्न नसक्दा त्यसपछि पटक पटक खेल सर्दै आएको छ ।