खोज

सल्यान, ३१ चैत ।
वनस्पति अनुसन्धान केन्द्र सल्यानको आयोजनामा वनस्पति संरक्षण, अनुसन्धान, समुदाय सहभागिता र जैविक चेतनाका कार्यक्रम एकै थलोमा गरिएको छ । कपुरकोट गाउँपालिका, ३ मूलपानी स्थित वनस्पति उद्यान परिसर र आसपासमा मिचाहा वनस्पतिको ब्यवस्थापन गरेर २३, चैतबाट सुरु भएर शुक्रबार मुख्य समारोहसँगै साताव्यापी कार्यक्रम सम्पन्न भएको वनस्पति अनुसन्धान केन्द्र सल्यानका प्रमुख डाक्टर मित्रलाल पाठकले जानकारी दिए ।

वनस्पति बिभागको ६५ औं बार्सिकोत्सव तथा २६ औं वनस्पति दिवसको अवसरमा एकहप्ता सम्म विभिन्न कार्यक्रम सञ्चालन गरिएको हो । दिवसको अवसरमा दुर्लभ तर महत्वपूर्ण वनस्पति काकडसिङ्गीको महत्व र संरक्षणका लागि सञ्चालन भएको काकडसिङ्गी कप ब्याडमिन्टन प्रतियोगितामा सुवास हमाल र भुवन डाँगीको टीम पहिलो, लोक बहादुर बस्नेत र भुवन महतराको टीम दोश्रो र यमराज महतारा र दिनेश थापाको टीम सान्तवना भएको थियो । विजयी टीमलाई क्रमशः १० हजार, आठ हजार र पाँच हजार रूपैयाँ पुरस्कार प्रदान गरिएको डाक्टर पाठकले बताए ।

यस्तै हाजिरीजवाफ प्रतियोगितामा नेरामावि किमुचौर पहिलो, ब्लु डायमन्ड बोर्डिङ स्कुल दोश्रो तथा जीवन ज्योती नमुना मावि रीम तेश्रो भएका थिए । यस वर्ष जैविक विविधता सचेतना सम्मानबाट पत्रकार सरिता चलाउने र खकेन्द्र केसीलाई सम्मान गरिएको थियो । यस्तै उत्कृष्ट कर्मचारी सम्मान संगै जनप्रतिनिधि एवम् सरोकारवालाकाविच अन्तरक्रिया कार्यक्रम पनि सम्पन्न भएको अनुसन्धान केन्द्रले जनाएको छ ।

विशेष गरेर दिवसको अवसरमा केन्द्रले सल्यानमा यसवर्ष काकडसिङ्गीको संरक्षणका लागि अभियान सुरु गरेको छ । सल्यान सहित कर्णालीका केही जिल्लामा मात्र पाइने बहुउपयोगी र औषधीय महत्व बोकेको दुर्लभ वनस्पति काकडसिङ्गीको खोजी र संरक्षणमा अभियान थालिएको हो । यसमा पाइने राइबोफ्लोबिन, एस्कार्बिक एसिड, कैरोटेन, निकोटिन एसिड, ग्लूटामाइन, ल्यूटियोलिन, पीपेकोलिक र मोमोरडिन जस्ता तत्वहरूले गर्दा रुघा–खोकी, ज्वरो, दम, रक्तपित्त, यौन दुर्बलता, प्रजनन समस्या, उच्च रक्तचाप नियन्त्रण जस्ता रोगमा औषधीको रूपमा प्रयोग हुँदै आएको छ । यस वनस्पतिको खपत तथा व्यापारिक मूल्य उच्च भएकाले लोप हुने खतरा बढेको छ । त्यसैले वनस्पति अनुसन्धान केन्द्र सल्यानले यसमा अनुसन्धान, खोज, संरक्षण तथा प्रवद्र्धनका कार्यहरूलाई अभियानकै रूपमा अघि बढाइरहेको छ ।