खोज

बुटवल, ३० चैत ।
नेवा सेवा समितिको १६ औं साधारणसभा तथा ७ औं अधिवेशनबाट डिल्ली कुमार श्रेष्ठक अध्यक्षतामा १३ सदस्यीय कार्यसमिति सर्वसम्मत चयन भएको छ । शनिबार बुटवलमा सम्पन्न अधिवेसनबाट संस्थाको वरिष्ठ उपाध्यक्ष दल बहादुर श्रेष्ठ, उपाध्यक्ष शारदा श्रेष्ठ, सचिव लक्ष्मण श्रेष्ठ, कोषाध्यक्ष प्रमोद कसजू, सहसचिव देवकुमार श्रेष्ठ, सदस्य ओम प्रकाश श्रेष्ठ (ख), अर्जुन श्रेष्ठ, रमेश कुमार श्रेष्ठ, लिलप्रसाद श्रेष्ठ, अनिल कुमार चुके, भगवती श्रेष्ठ, लक्ष्मी कर्माचार्य सर्वसम्मत चयन भएका छन । यसैगरि संस्थाको लेखा समिति संयोजक ध्रुव कुमार श्रेष्ठ, सदस्य जनकलाल श्रेष्ठ, सुर्यलाल श्रेष्ठ सर्वसम्मत चयन भएका छन ।

यसैगरि महिला समितितर्फ चमेली श्रेष्ठको अध्यक्षतामा उपाध्यक्ष बिष्णुमाया श्रेष्ठ, सचिव लक्ष्मी कर्माचार्य, सहसचिव भगवती श्रेष्ठ, कोषाध्यक्ष सम्झना श्रेष्ठ, सहकोषाध्यक्ष पार्वती श्रेष्ठ, सदस्यहरुमा अन्जु श्रेष्ठ, भिम कुमारी श्रेष्ठ, जमुना राजभण्डारी, सरिता श्रेष्ठ (ख) सर्वसम्मत चयन भएको निर्वाचन समितिका संयोजक रामलाल श्रेष्ठले बताए ।

नेवा सेवा समितिको १६औं साधारणसभा तथा ७ औं अधिवेशन शनिबार बुटवलमा सम्पन्न भएको छ । लुम्बिनी प्रदेशसभा सदस्य भोजप्रसाद श्रेष्ठले कार्यक्रमको उद्घाटनमा नेवार समुदायको योगदानलाई स्मरण गर्दै भाषा, संस्कृति र पहिचानको आन्दोलन अझै मजबुत रूपमा अघि बढाउनु पर्ने आवश्यकता औल्याए । “हाम्रो भाषा र संस्कृति केवल समुदायको मात्रै नभएर नेपालको पहिचान हो,” उनले भने “नेपाल भाषा र नेवार समुदायले सदियौँदेखिको सभ्यता बोकेको छ। त्यसलाई संरक्षण गर्न नीति निर्माण तहदेखि व्यवहारिक तहसम्म पहल गर्नुपर्छ ।” उनले सामाजिक न्यायको सवालमा पनि जोड दिए । “आज पनि हामी जात, धर्म र भाषाको आधारमा विभेदको शिकार छौँ,“ उनले भने, “बुद्धको सन्देश करुणा र समानताको हो। त्यसलाई व्यवहारमा उतार्नुपर्छ । अन्तर्राष्ट्रिय मञ्चमा हाम्रो भाषा, संस्कृति र पहिचानको प्रतिनिधित्व गरिनुपर्छ । यस अभियानमा युवा पुस्ताको भूमिका निर्णायक हुनेछ ।“

कार्यक्रममा बुटवल उपमहानगरपालिकाका नगरप्रमुख खेलराज पाण्डेले नेवार समुदायको भाषा, लिपि र संस्कृतिको संरक्षण नगरको दायित्व भएको बताउँदै बुटवल विविधताभित्र एकताको नमुना भएको शहर भएको उल्लेख गरे । उनले भने, “बुटवलमा विभिन्न जातजाति र समुदायको साझा बास छ। यहाँको सामाजिक समरसता र आपसी मेलमिलापले हामीलाई आफ्नो भाषा र संस्कृति जोगाउने प्रेरणा दिन्छ ।“ उनले ,“नगरपालिकाले स्थानीय तहमा भाषा, लिपि र संस्कृतिको संरक्षणका लागि आवश्यक कार्यक्रम ल्याउने तयारी गरिरहेको छ। नेवार समुदायको इतिहास, संस्कृति र योगदानलाई सम्मान गर्दै हामी भविष्यमा संस्कृति सम्बद्ध कार्यक्रमहरूलाई अझ संस्थागत बनाउनेछौँ ।”

त्यस्तै नेवा सेवा समितिका अध्यक्ष चिरञ्जीवी श्रेष्ठले संस्थाको हालसम्मका गतिविधि, सफलता प्रस्तुत गर्दै भने, “नेवा सेवा समिति शुरुदेखि नै भाषा र संस्कृतिको संरक्षण, अनि समाजमा मेलमिलाप र समझदारी बढाउने काममा सक्रिय छ । यो संस्था केवल पुराना परम्परा जोगाउने ठाउँ मात्रै होइन, नयाँ पुस्तालाई आफ्नो भाषा, संस्कृति र पहिचान बुझाउने माध्यम पनि हो ।”

कार्यक्रममा नेवा पुच बुटवलका अध्यक्ष काजिमान श्रेष्ठ, संस्थाका सल्लाहकार रामलाल श्रेष्ठ, नेवा देय दबु लुम्बिनी प्रदेश अध्यक्ष रुद्र प्रसाद श्रेष्ठ, वरिष्ठ उपाध्यक्ष बसन्ती श्रेष्ठ, सचिव शारदा श्रेष्ठले नेवार समुदायको ऐतिहासिक योगदान र भविष्यका चुनौतीबारे आफ्नो धारणा राखे ।

यसैबिच समाजले आयोजना गरेको रक्तदान कार्यक्रममा २६ युनिट रगत संकलन भएको छ । कार्यक्रममा संस्थाका अध्यक्ष चिरञ्जीवी श्रेष्ठले वार्षिक प्रतिवेदन पेश गरेका थिए । कार्यक्रममा उत्कृष्ट प्रदर्शन गर्ने दुई जना विद्यार्थी, जेष्ठ नागरिकतर्फबाट ६ जनालाई विशेष सम्मान प्रदान तथा संस्थालाई मिडिया क्षेत्रबाट उल्लेखनीय योगदान पुर्याएको भन्दै पत्रकार सुमन श्रेष्ठलाई सम्मान गरिएको थियो ।