खोज

बुटवल, २९ चैत । बुटवलमा जारी यू–१४ टि ट्वान्टी क्रिकेट प्रतियोगितामा रुपन्देही क्रिकेट एकेडेमी र नवज्योती क्रिकेट एकेडेमी विजयी भएका छन । वेस्टर्न क्रिकेट क्लब बुटवलको आयोजना तथा बुटवल उपमहानगरपालिकाको आर्थिक सहयोगमा शुक्रबार भएको पहिलो खेलमा रुपन्देही क्रिकेट एकेडेमीले प्यारामाउण्ट क्रिकेट एकेडेमीलाई १०० रन तथा तथा दोस्रो खेलमा नवज्योती क्रिकेट एकेडेमीले लुम्बिनी वल्र्डलाई ९४ रनले पराजित गरेको हो ।

नरैनापुर क्रिकेट मैदानमा भएको पहिलो खेलमा रुपन्देहीले टस जितेर ब्याटिङ रोजेर निर्धारित २० ओभरमा ६ बिकेटको नोक्सानीमा १५९ रनको लक्ष्य खडा गरेको थियो । रुपन्देहीका सुगम पोखरेलले ३९ बलमा ३२ रन, सोयब हसन मुसलमानले १७ बलमा नटआउट २९ रनको योगदान दिए । प्यारामाउण्टका बिराट रोकाहाले २ बिकेट लिए । मध्यम लक्ष्य पछ्याएको प्यारामाउण्टका ब्याट्सम्यानहरु १७.५ ओभरमा केवल ५९ रनमा समेटियो । प्यारामाउण्टका अस्मित अर्यालले २९ बलमा १३ रनबाहेक अन्य ब्याट्सम्यानहरु दोहोरो रन जोड्न सकेनन । कम स्कोरमा रोक्न रुपन्देहीका सोयब हसन मुसलमानले ३ तथा सरिक अलि, सत्यम हरिजनले समान २–२ बिकेट लिए । खेलमा रुपन्देहीका सोयब हसन मुसलमान प्लेयर अफ दी म्याचबाट पुरस्कृत भए ।

यसैगरि दोस्रो खेलमा टस जितेर नवज्योतीले निर्धारित २० ओभरमा ३ बिकेटको नोक्सानीमा १६० रनको लक्ष्य खडा गरेको थियो । उसका लागि ओपनर फुलचन्द प्रजापतिले ४२ बलमा ४६ तथा ईमरान खानले नटआउट ३७ बलमा ३६ रनको योगदान दिए । लुम्बिनी वल्र्डका करन पोखरेलले २ तथा गोकर्ण भण्डारीले १ बिकेट लिए । मध्यम लक्ष्य पछ्याएको लुम्बिनी वल्र्डका ब्याटर १६.५ ओभरमा केवल ६६ रनमा समेटियो । लुम्बिनीका गोकर्णराज भण्डारीले २३ बलमा २५ तथा मिकाल ऐरीले ३६ बलमा १६ रनबाहेक अन्य ब्याट्सम्यानले दोहोरो रन जोड्न सकेनन । कम स्कोरमा रोक्न नवज्योतीका कार्तिक शाहनीले ४ तथा ईमरान खान र कुनाल भार्गवल समान २–२ बिकेट लिए । खेलमा नवज्योतीका ईमरान खान प्लेयर अफ दी म्याचबाट पुरस्कृत भए ।

प्रतियोगितामा १२ वटा टिम दुई समुह विभाजन गरी राउण्ड रोविनका आधारमा खेलाएर समूहको शिर्ष दुई टोलीले उपाधिका लागि प्रतिस्पर्धा गर्ने क्लबका अध्यक्ष भुवन पाण्डेले बताए । प्रतियोगितामा विजेता टिमले नगद ४१ हजार ट्रफी, मेडल र प्रमाणपत्र तथा उपविजेता टिमले २१ हजार नगद राशी प्राप्त गर्ने उनले बताए । यसैगरी विधागत तर्फ उत्कृष्ट व्याट्सम्यानलाई २ हजार ५ सय, सर्वोत्कृष्ट खेलाडीलाई ५ हजार नगद राशीले सम्मान गरिने उनले बताए ।