खोज

बुटवल, २८ चैत ।
नेपाली काँग्रेसका महामन्त्री तथा प्रतिनीधि सभा सदस्य गगन थापाले बर्तमान केपी शर्मा ओली नेतृत्वको सरकारले जनताको अपेक्षा अनुसारको काम गर्न नसकेको बताएका छन् । संख्याका हिसाबले सबैभन्दा शक्तिशाली सरकारले आफ्नो शक्तिअनुसारको काम गरेर देखाउन नसकेको बताएका हुन् ।नेपाली काँग्रेस रूपन्देही क्षेत्र नं. १ को बुधबार देवदहमा भएको दोस्रो क्षेत्रीय सम्मेलनलाई सम्बोधन गर्दै महामन्त्री थापाले संसद र सरकारका लागि अझै दुई अढाई वर्ष बाँकी रहेकाले समयको सदुयोग गरेर सरकारको डेलीवरी दिन र संसदलाई विजनेश दिन आग्रह गरे । काँग्रेस एमालेको संयुक्त सरकार रहेकाले आफूहरूले सरकारलाई सहयोग र खवरदारी सँगसँगै गर्ने बताउँदै उनले भने–‘आज देशमा धेरै समस्याहरू छन्, सबैभन्दा ठूलो समस्या अर्थतन्त्रमा छ, रोजगारीको समस्या छ । सरकारको स्पिड पुगेन, डुल्ने घुम्ने कुरा छाडदिनुहोस, काम गर्नुहोस् ।’ ‘बैंकमा यतिधेरै पैसा छ तर लोन लिन कोही जाँदैन, यहाँ केही हुँदैन बाहिरै जानुपर्छ भन्ने राष्ट्रिय रूपमै मनोविज्ञान बनेको छ ।’ उनले थपे–‘उद्यमशिलता कसरी विकास गर्ने, वेरोजगार युवालाई राम्रो आम्दानी सहितको रोजगारी कसरी सिर्जना गर्ने भन्ने तर्फ हाम्रो ध्यान जान आवश्यक छ ।’

सरकारले ठिक ढंगले काम गरेको भए शिक्षकहरू आन्दोलित हुन नपर्ने बताउँदै भने–‘विँड तातेर मात्रै नहुनेरहेछ, ताप्के तात्नुपर्दो रहेछ ।’ उनले लोकतन्त्रको विकल्प लोकतन्त्रै भएको बताउँदै संघीय लोकतान्त्रिक व्यवस्थालाई अझै सुदृढ गर्नुपर्ने बताए । संविधानमा धेरै कुराहरू रहेको बताउँदै दश वर्षको अनुभवले संविधान भित्रका केही अन्तरबस्तुहरूलाई सुधार गर्नुपर्ने भनाइ राखे । ‘प्रणालीमा समस्या छ, जनप्रतिनिधिको संस्था धेरै छ, यति धेरै चाहिँदैन, संघीयता ठिक छ तर हामी टाउकाले टेकेर उभिएका छौं, खुट्टाले टेकेर उभिने बनाउनु पर्नेछ । होईन भने चल्दैन टिक्दैन, प्रदेशलाई पनि आफ्नै खुट्टामा उभिने बनाउनु पर्नेछ । प्रदेश संरचनालाई पनि संक्षिप्त र चुस्त बनाउनु पर्नेछ ।’ सरकारले यी कुरामा ध्यान दिनुपर्ने बताउँदै त्यसतर्फ छलफल र बहस आजको आवश्यकता भएको उनले थपे ।

महामन्त्री थापाले पार्टीको १५ औं महाधिवेशन २०८३ मंसिर भित्रै हुने दाबी गर्दै त्यसका लागि समयमै क्रियाशिल नवीकरण गरेर पार्टीलाई चुस्त बनाउन आग्रह गरे । पार्टीभित्र चरम गुटवन्दी रहेको बताउँदै पार्टीको विधि र पद्दतीमा रहेर काम गर्न नेता कार्यकर्तालाई आग्रह गरे । पार्टी भित्रको आन्तरिक गुटवन्दीले पार्टीलाई धेरै कमजोर बनाएको बताउँदै उनले भने–‘पार्टी भित्र चरम गुटबन्दी छ, केन्द्रमा मात्रै होइन, प्रदेश, जिल्ला, क्षेत्र, नगर, वडा, टोल त्यतिमात्रै होईन, भात्री संगठन र शुभेच्छुक संस्थामा पनि चरम गुटबन्दी छ ।’ क्षेत्रीय सभापति हिराबहादुर खत्रीको अध्यक्षतामा भएको कार्यक्रममा बोल्दै पार्टीका केन्द्रीय सदस्य तथा पूर्वगृहमन्त्री बालकृष्ण खाँणले नेपाली काँग्रेस र लोकतन्त्र एक अर्काका पर्यावाची रहेको बताउँदै लोकतन्त्रलाई बलियो बनाउन बलियो नेपाली काँग्रेस आवश्यक रहेको भनाई राखेका थिए ।