खोज

गुल्मी, २८ चैत ।
मृगौला पीडित गुल्मी चन्द्रकोटकी एक महिलालाई गुल्मी जिल्ला समाज युकेले चार लाख १६ हजार रूपैयाँ आर्थिक सहयोग गरेको छ । दुबै मृगौलाबाट पीडित बनेकी जिल्लाको चन्द्रकोट गाउँपालिका –४ शान्तिपुरकी कमला थापामगर खत्रीलाई समाजको तर्फबाट उक्त रकम सहयोग गरिएको हो ।गुल्मी जिल्ला समाजको आव्हानमा वेलायतमा सङ्कलन गरिएको उक्त रकम काठमाडौंमा उपचारत पीडितलाई हस्तान्तरण गरिएको सहयोग सङ्कलन संयोजक एवं समाजका संस्थापक अध्यक्ष ओमप्रसाद थापा काउछाले जानकारी दिएका छन् ।

दुबै मृगौला फेल भएपछि आर्थिक अभावका कारण उपचारमा समस्या उत्पन्न भएपछि उनको परिवारको आग्रहमा कमला बचाउँ अभियान सञ्चालन गरी समाजको तर्फबाट वेलायतमा आर्थिक रकम सङ्कलन गरिएको थियो । बिरामी बनेपछि उहाँको मेरुदण्डमा समेत समस्या देखिएका कारण कमलाको कम्मरभन्दा तलको भाग चल्दैन । शुरु शुरुमा उपचारका लागि परिवारबाट सक्दो प्रयास गरेपनि उनको उपचार निकै खर्चिलो भएपछि परिवारले सहयोगका लागि समाजसँग आग्रह गरेको संयोजक थापाले बताए ।

गुल्मी जिल्ला समाज युकेको तर्फबाट समाजका अध्यक्ष रुद्र थापा, महासचिव महलाल घिमिरे तथा कार्यसमितिको तर्फबाट सहयोगदातालाई उपचारमा सहयोग गर्न आग्रह गरिएको थियो । समाजले पठाएको उक्त रकम समाजको तर्फबाट रूपा राना र पिन्की रानालाई काठमाण्डौमा उपचाररत पीडितसँग पुगेर चेक मार्फत रकम उपलब्ध गराईएको थियो । रकम प्राप्त गरेपछि कमलाले अब आफुलाई बाच्ने आशा पलाएको भन्दै सहयोग गर्नेहरूलाई मनैदेखि आभार व्यक्त गरेको बताईन । ‘सेवा नै पुण्य धर्म हो‘ भन्ने मूल मन्त्रलाई आत्मसाथ गर्र्र्दै गुल्मी जिल्ला समाजले आफ्नो स्थापनादेखि जिल्ला र जिल्ला बाहिर समेत शिक्षा, स्वास्थ्य तथा विभिन्न विभिन्न विपद तथा प्रकोपहरूमा व्यक्ति एवं संस्थाहरूलाई सहयोग गर्दै आएको छ ।

गुल्मी जिल्ला समाज युकेले शुरु गरेको सहयोग सङ्कलन अभियानका ७६ जना व्यक्तिहरू जोडिएका थिए । सहयोग सङ्कलन अभियानका संयोजक थापा काउछाले मनैदेखि हयोग गर्ने सबैलाई समाजको तर्फबाट धन्यवाद दिएका छन ।