खोज

बुटवल, २७ चैत ।
बुटवलमा जारी आठौ भुपु सैनिक कप नकआउट फुटबल प्रतियोगितामा फर्साटिकर युथ क्लब फर्साटिकर विजयी हुदै अन्तिम चारमा स्थान बनाएको छ । भुपु सैनिक सालघारी समाजको संरक्षकत्व र भूपु सैनिक जबई स्पोर्टिङ्ग क्लबको आयोजनामा बुधबार भएको खेलमा जनशक्ति युवा क्लब, नवलपरासीलाई ४–० गोल अन्तरले पराजित गर्दै फर्साटिकर युथ क्लब फर्साटिकर सेमीफाईनलमा स्थान बनाएको हो । फर्साटिकरले सिम्रिक युथ क्लबसंग पहिलो सेमीफाईनल खेल्नेछ ।

भुपु सैनिक खेलमैदानमा भएको एकतर्फी खेलमा फर्साटिकरको जितमा बिशाल बिक नायक रहे । उनले खेलमा अलराउण्ड प्रदर्शन गरे । खेलको ८ औ मिनेटमा बिशालले गोल गर्दै टिमलाई अग्रता दिलाए । खेलको १९ औ मिनेटमा गणेश हमालले अन्तरलाई दोब्बर गरे । खेलको २६ औ मिनेटमा तारा थापाको आत्मघाती गोलका कारण गोल अन्तर थप बढ्यो । पहिलो हाफमा ३ गोलले पछि परेको जनशक्ति दोस्रो हाफमा थप एक गोल खान पुग्यो । खेलको ४९ औ मिनेटमा निगम अलीले थप गोल गरे । खेलमा फर्साटिकरका बिशाल बिक प्लेयर अफ दी म्याचबाट पुरस्कृत भए ।

बिहिबार सौभाग्य युवा क्लब बुटवल र भैरव स्र्पोटस क्लब नवलपरासीका बिचमा खेल हुने संयोजक शिव कुमार थापाले बताए ।

प्रतियोगिताको विजेता टिमले नगद २ लाख २२ हजार २२२ रुपैया, कप, मेडल, प्रमाणपत्र तथा उपविजेता टिमले नगद १ लाख ११ हजार १११ रुपैया, कप, मेडल, प्रमाणपत्रबाट पुरस्कृत गरिने क्लबका अध्यक्ष गोपीराम पुनले बताए । यसैगरि विधागत उत्कृष्ट चारजना र एक जना सर्वोत्कृष्ट खेलाडीलाई नगदसहित कपबाट पुरस्कृत गरिने उनले बताए । नवलपरासीका दुई र रुपन्देही ६ टिमसहित आठ टिमले भाग लिने उनले बताए ।