खोज

बुटवल ।

लायन्स क्लब बुटवल सयपत्रीले बुटवलमा अवस्थित नन्दनी गौशालामा दुई टाली पराल, भेली र केरा हस्तान्तरण गर्दै सहयोग गरेको छ। सडकमा छोडिएका पशुहरूको संरक्षणका लागि बुटवल उपमहानगरपालिकाले सञ्चालनमा ल्याएको गौशालामा रहेका गाईहरूलाई पोषणयुक्त आहारको आवश्यकता रहेकाले संघसंस्था र क्लबहरूले पहल गर्नुपर्ने देखिएको क्लबकी अध्यक्ष कमला बस्नेत कुँवरले बताइन्। यही आवश्यकतालाई मध्यनजर गर्दै क्लबले उक्त सहयोग कार्यक्रम सञ्चालन गरेको हो।

कार्यक्रम क्लबकी अध्यक्ष बस्नेत कुँवरको अध्यक्षतामा सम्पन्न भएको थियो। कार्यक्रममा डिष्ट्रिक्ट ३२५ पी का गर्भनर लायन पुष्पोत्तम भक्त प्रधानांग प्रमुख अतिथि थिए भने निवर्तमान गर्भनर लायन अर्जुनमान सैंजु विशिष्ट अतिथि थिए। साथै, एरिया चिफ दिपकप्रसाद श्रेष्ठ र जोन चिफ महेशप्रसाद श्रेष्ठको आतिथ्यता रहेको थियो। क्लबका संस्थापक अध्यक्ष र पूर्वअध्यक्ष राधा श्रेष्ठ पनि कार्यक्रममा सहभागी भएकी थिइन्।

मुख्य अतिथि प्रधानांगले गाई हाम्रो संस्कृति, कृषि र मानव जीवनको अभिन्न अङ्ग भएको उल्लेख गर्दै गाईको संरक्षण गर्नु क्लबहरूको सामाजिक दायित्व भएको बताए। उनले लायन्स क्लब सयपत्रीले यसअघि पनि कपिलवस्तुलगायत विभिन्न स्थानमा रहेका गौशालामा यस्तै प्रकारका सहयोग कार्यक्रम सञ्चालन गरेको जानकारी दिँदै आगामी दिनहरूमा पनि निरन्तर सहयोग गर्न आग्रह गरे। कार्यक्रमकी डाइरेक्टर आरती श्रेष्ठ र शान्ति अर्यालले मन्तव्य राखेका थिए।