खोज

बुटवल, २४ माघ
स्वर्ण वर्ष प्रवेशको अवसरमा भूपु सैनिक जबई स्पोर्टिङ्ग क्लबले विविध रचनात्मक कार्यक्रम र फुटबल प्रतियोगिता गर्ने भएको छ । बुटवलमा स्थापित र पुरानो क्लब भुपु सैनिकले ५० औ वर्ष पुगेको अवसरमा आठौ भुपु सैनिक कप नकआउट फुटबल प्रतियोगिता २०८१/२०८२, नया वर्ष २०८२ तथा सास्कृतिक कार्यक्रम र रक्तदान कार्यक्रम समेत गर्ने भएको हो ।

कार्यक्रममा क्लबका अध्यक्ष गोपीराम पुनले सालघारी क्षेत्रमा पर्व र संस्कृतिका रुपमा रहेको कार्यक्रमलाई निरन्तरता दिन लागेको बताए । २०८१ चैत २५ गतेबाट शुरु भएर २०८२ बैशाख १ गते भब्य रुपमा सास्कृतिक कार्यक्रम सहित समापन गरिने उनले बताए । राष्ट्रिय कलाकार सागर आलेसहित छमछमीको कलाकारहरुको प्रस्तुती समेत रहने उनले बताए ।

स्थानियहरुको सहयोग र खेलप्रेमीहरुको साथले ईतिहास जोगाउने गरि खेलकुद गतिविधिका निरन्तरता दिएको भन्दै उनले भौतिक विकासको योजना ढिलाई हुदा यसबाट समग्र खेल क्षेत्र पछि परेको दुखेसो गरे । ‘भुपु सैनिक क्लबको जबई खेलमैदानको स्तरोन्नती जरुरी छ ।’–उनले भने । नेपाली सास्कृतिक पर्वहरुलाई सदुपयोग गर्दै त्यसबाट संकलन भएको रकमले मैदानको स्तरवृद्धि र वाल उठाउने कामहरु विगतमा भएको उनले बताए ।

भुपु सैनिक सालघारी समाजको संरक्षकत्व तथा भुपु सैनिक जबई स्पोर्टिङ क्लबको आयोजनामा फुटबल प्रतियोगिता हुने खेल संयोजक शिव कुमार थापाले बताए । प्रतियोगिताको विजेता टिमले नगद २ लाख २२ हजार २२२ रुपैया, कप, मेडल, प्रमाणपत्र तथा उपविजेता टिमले नगद १ लाख ११ हजार १११ रुपैया, कप, मेडल, प्रमाणपत्रबाट पुरस्कृत गरिने उनले बताए । यसैगरि विधागत उत्कृष्ट चारजना र एक जना सर्वोत्कृष्ट खेलाडीलाई नगदसहित कपबाट पुरस्कृत गरिने उनले बताए । नवलपरासीका दुई र रुपन्देही ६ टिमसहित आठ टिमले भाग लिने उनले बताए । गतवर्ष गोर्खा ब्याईज क्लब विजेता रहेको थियो । १९ लाख रुपैया खर्च हुने अनुमान छ ।