खोज

नेपालगञ्ज, २३ चैत
आगामी बैशाख ५ गतेदेखि नेपालगञ्जमा हुने लुम्बिनी कप अन्तराष्ट्रिय आमन्त्रण महिला फुटबल प्रतियोगिताको टि–सर्ट सार्वजनिक गरिएको छ । लुम्विनी प्रदेशका आन्तरिक मामिला तथा कानून मन्त्री आदेश कुमार अग्रवालले शनिवार एक समारोहकाबीच टि–सर्ट सार्वजनिक गरेकाहुन् । महिला खेलाडीलाई प्रोत्साहन गर्नकोलागि आयोजना हुन गईरहेको प्रतियोगितालाई सबैले आत्मसात गरेर सफल बनाउनुपर्ने मन्त्री अग्रवालले जोड दिए । उनले भने ‘खेलकुदको क्षेत्रमा तीनै तहको सरकारको नजर अलि कम परेको महसुस गरेको छु तर, लुम्विनी प्रदेशबाट त्यस्तो हुँदैन ।’ नेपालगञ्जलाई चिनाउने खालका प्रदेश तथा राष्ट्रिय स्तरको धेरै प्रतियोगिता आयोजना हुँदै आएपनि सरकार पक्षबाट चासो नदेखाएको आरोप लाग्ने गरेको तर, आफू मन्त्री भएको ६ महिना वितिसक्दा पनि सहयोगकोलागि कसैको प्रस्ताव नआएको उनले बताए । ‘यो प्रतियोगिता सफल पार्न लुम्विनी प्रदेश सरकारको सहभागिता अवश्य रहनेछ ।’ उनले भने — ‘हाम्रो प्रदेशमा खेलकुद मन्त्रालय मुख्य मन्त्रीले नै हेरीरहनुभएको छ, प्रस्ताव लिएर आउनुस उहाँले अवश्य पनि यसलाई सकारात्मक लिनुहुनेछ ।’

कार्यक्रमलाई सम्बोधन गर्दै बाँके जिल्ला फुटबल संघका अध्यक्ष एवम् अखिल नेपाल फुटबल संघका केन्द्रिय सदस्य भोजराज शाहीले लामो समयको अन्तरालपछि बाँके जिल्लाले महिला फुटबल खेलाडी उत्पादन गरिरहेको बताए । नेरी थापा, पूजा राना, कृष्णा खत्री निर्मला उपाध्याय जस्ता महिला फुटबल खेलाडी यहि क्षेत्रबाट जन्माएको स्मरण गराउँदै उनले भने –‘महिला फूटवल खेलाडी उत्पादनमा धेरै गयापिङ भयो, अव यसलाई निरन्तरता दिनेछौ ।’ दोस्रो लुम्विनी कपमा अझ राम्रो फुटवल टीम यसै क्षेत्रबाट बनाउने उनले बताए ।

पश्चिम नेपालमा महिला फुटबलको विकासमा प्रतियोगिता महत्त्वपूर्ण साबित हुने आयोजक अन्तरालका कार्यकारी प्रमुख जयनारायण शाह बताए । प्रतियोगिता आयोजना हुनलागेको जानकारी पाएपछि देशभरबाट थुप्रै महिला फुटबल टीमले सहभागिताकोलागि सम्पर्कमा आएको तर, आठ वटा टीमलाई मात्र सहभागिता गराउने पहिले नै निश्चित भईसकेको उनले जानकारी दिए । आठौं राष्ट्रिय खेलकुद प्रतियोगिता हुँदा निर्माण गरिएका संरचना जिर्ण भईसकेकाले मर्मत सम्भारकालागि प्रमुख शाहले मन्त्री अग्रवालको ध्यानाकर्षण गराए । शैचालय र पानीको ब्यवस्था तत्काल गर्नुपर्ने अवस्था रहेको उनले औंल्याए । अन्तरालको आयोजना र बाँके जिल्ला फुटबल संघको सहकार्यमा आगामी बैशाख ५ देखि १५ गते सम्म हुने प्रतियोगितामा बाँके सहित राष्ट्रिय महिला फुटबल टीम र भारतिय महिला फुटबल टीम गरी ८ वटा टीमको सहभागिता रहने आयोजकले बनाएको छ ।

प्रतियोगिताको मिडिया संयोजक निरज गौतमले सहजीकरण गरेको टि–सर्ट सार्वजनिक कार्यक्रममा नेपाल पत्रकार महासंघ लुम्बिनी प्रदेशका अध्यक्ष शुक्र ऋषि चौलागाई, महासंघ बाँकेका अध्यक्ष नविन गिरी, मध्यपश्चिम खेलकुद विकास समिति लुम्बिनी प्रदेशका प्रमुख महेश चन्द, नेपालगञ्ज उपमहानगरपालिकाका निबर्तमान उप प्रमुख उमा थापा मगरले प्रतियिगतालाई सबैले अवन्त्व लिए अवश्य सफल हुने बताएका थिए ।