खोज

बुटवल, २३ चैत ।
नेपालमा महिला फुटबलको क्रेज बढ्दो छ । नेपाली फुटबल खेलाडीहरू सेलिब्रेटीका रूपमा सामाजिक संजालमा चर्चा पाएका छन । नेपाली राष्ट्रिय टिमको गोलरक्षक अन्जिला तुम्बापो सुब्बाको बायोग्राफी सिनेमाघरमा पछिल्लो समय चर्चा बटुलेको छ । उत्कृष्ट खेल शैलीबाट नेम, फेम र आयआर्जन गर्न सकिन्छ भन्ने गतिलो उदाहरण नेपाली महिला फुटबलरहरूले दिएका छन ।

नेपाली फुटबलका स्ट्राईकर साबित्रा भण्डारी (साम्बा), रेखा पौडेल, एन्जिला तुम्बापो सुब्बालगायत धेरै नेपाली टिमका खेलाडीहरू विदेशी फुटबल टिममा अनुबन्ध भएर आफनो खेल प्रदर्शन गरेका छन । खेलबाट समेत जीविकोपार्जनको अवसरलाई नेपाली महिला फुटबल खेलाडीहरूले अन्तर्राष्ट्रिय स्तरमा आफनो प्रदर्शनलाई कायम राखेका छन ।
महिला फुटबलको यही क्रेजलाई मध्येनजर गर्दै पछिल्लोसमय महिला फुटबल प्रतियोगितामा सरकार र सरोकारवाला निकायहरूले जोड दिन थालेका छन । शनिबारदेखि बुटवलमा पनि महिला फुटबल प्रतियोगिता हुने भएको हो । बिस पचहत्तर युवा परिवार, बुटवलको आयोजनामा शनिबारदेखि प्रिती प्रथम उपमेयर कप नकआउट फुटबल प्रतियोगिता–२०८१ हुने भएको हो ।

खेल संचालन हुने सिद्देश्वरी लालकुमारी माबिको खेलमैदानमा सजाईएको छ । मैदानको पश्चिम र उत्तरतर्फ अस्थायी प्याराफिट बनाइएको छ । जहाँ १ हजार जना अट्ने आयोजक क्लबका अध्यक्ष अध्यक्ष सुरेन्द्र थापाले बताए । यसअघि संचालन भएको प्रतियोगितासँगै मैदानलाई चारैतिर बार लगाएर मर्मत गरेको उनले बताए । ‘मैदानमा अहिले राम्रो दुबो उम्रेको छ,’– उनले भने । महिला फुटबल खेलाडीहरूलाई प्लेटफर्म दिदै बुटवलका दर्शकलाई समेत नयाँ खेलको मजा दिने गरि प्रतियोगिता गर्न लागेको उनले बताए । श्रोत नहुदा ब्यवस्थापनमा केही कठिनाई देखिएको भएपनि स्थानिय सरकार, केही प्रायोजक र टिकटबाट समेत गरि खर्च ब्यवस्थापन गर्न लागेको उनले बताए ।

प्रतियोगितामा आयोजक टिममा अन्जना रानामगर, उषा नाथ, रेनुका नगरकोटी, पुजा थापा, निसा ठोकर लगायत राष्ट्रिय खेलाडीहरू खेल्ने तयारी भएको छ । बुटवलमा पहिलोपटक यो स्तरको महिला फुटबल हुन लागेको क्लबका सचिव दिपक गुरुङले दाबी गरे । प्रतियोगिताको उपाधि विजेता टिमले नगद १ लाख रूपैयाँ, कप, मेडल, प्रमाणपत्र तथा उपविजेता टिमलाई नगद ५० हजार रूपैयाँ, कप, मेडल, प्रमाणपत्रबाट पुरस्कृत गरिने छ । यसैगरि विधागत रूपमा सर्वोत्कृष्ट खेलाडीलाई २५ हजार रूपैयाँसहित कप तथा ४ जना उत्कृष्ट खेलाडीहरूलाई नगद १० हजारसहित कपबाट पुरस्कृत गरिने छ । प्रतियोगिता सम्पन्न गर्द करिब २० लाख खर्च हुने अनुमान गरिएको छ ।

चैत ३० गतेसम्म चल्ने प्रतियोगिता आयोजक बिसपचहत्तर युवा परिवार, सुनवल नगरपालिका, बिरगंज युथ एकेडेमी, बसन्त युनाईटेड क्लब चितवन, हेटौडा फुटबल एकेडेमी, राईजिङ स्टार युवा क्लब कपिलबस्तु, वालिङ, एमएससी भारतको टिम सहभागी हुँदै छन् । प्रतियोगिताको उद्घाटन खेल दिउँसो ३ बजे आयोजक बिस पचहत्तर युवा परिवार र सुनवल नगरपालिकाका वीच हुनेछ ।