खोज

बुटवल, २१ चैत ।
छपियाका महिला लघु उद्यमीहरुलाई लक्षित गरी ३ दिने तालिम दिईएको छ । सियारी गाउपालिकाको समन्वय तथा कोक्यापको आयोजनामा गरिबी निवारणका लागि लघु उद्यम विकास कार्यक्रम अन्तरगत लघु उद्यमीको स्तर उन्नतिका लागि व्यवसायिक योजना, प्याकेजिङ र बजारीकरण सम्बन्धि ३ दिने तालिम दिईएको हो । छपिया फिस भिलेजमा भएको समापन कार्यक्रममा तालिममा सहभागीहरुलाई प्रमाणपत्र वितरण गर्दै सियारी गाउपालिकाका अध्यक्ष थानेश्वर घिमिरेले ‘सीप सिकौ आत्मनिर्भर बनौ’ भन्ने नाराका साथ तालिम सार्थक बनाउन आग्रह गरे । तालिमलाई ब्यवहारमा लागू गर्न सकेमात्र त्यो उपलब्धिमुलक बन्ने उनको तर्क छ ।

सियारी गाउपालिका वडा नं ४ का वडाअध्यक्ष राम यादवले वडामा महिलाहरुलाई सीप सिकेर आयआर्जनमा जोडिन सकिने वातावरण तयार भएको दाबी गरे । माछाको अचार हुँदै यसको बजारीकरण, बेसिक सिलाई कटाईबाट फेसन डिजाईनसम्म, साथै सजावटको सामग्री निर्माण गर्ने तालिमहरु सफल रहेको उनले बताए ।तालिमका प्रशिक्षक दामोदर ज्ञवालीले खाद्यान्न उत्पादन मानव स्वास्थ्यसंग जोडिएको हुदा पनि संवेदशिल विषय भएको बताए । उद्योगलाई दर्ता गर्ने, गुणस्तर मापदण्डको पालना गर्ने, बजारीकरणका विषयमा ध्यान दिन सुझाव दिए ।

कार्यक्रममा सियारी गाउपालिकाका प्रशासकिय अधिकृत अशोक जिसीले महिलाहरुलाई स्वरोजगार बनाउने गरि तालिम दिईएको बताए । एडभान्स रुपमा अचार बनाउने, लेभलिङ र प्याकेजिङ साथै व्यवसाय योजना निर्माण तालिम दिएको उनले बताए । सियारी गाउपालिकाको लघु उद्यम विकास शाखाकी यशोधा थापाले महिलाहरुलाई आर्थिक रुपमा सबल बनाउन सकेमात्र शसक्तिकरण हुने भन्दै विगत लामोसमयदेखी सीपमुलक तालिमहरु दिदै आएको बताईन ।

छपिया माछा अचार समुहकी उपाध्यक्ष जमुना खत्रीले तालिमबाट व्यवसायिक रुपमा उत्पादनका बारेमा जानकारी पाएको बताईन । तालिममा माछाका अचार, सुकुटीमात्र होईन कागती, मुला, लप्सी लगायतको अचार बनाउदा किचनमा सुरक्षाको विषयमा समेत राम्रो ज्ञान पाएको उनि बताउछिन । दुई वर्षअघि समुहका २५ जनालाई तालिम दिएकोमा १३ जना अहिले पनि यसमा निरन्तरता दिदै आएका छन ।