खोज

चन्द्रौटा (कपिवलस्तु) , १९ चैत ।

कपिलवस्तुको शिवराज नगरपालिकामा प्रस्तावित नगर शिक्षाको योजना मस्यौदा माथि पृष्ठपोषण तथा सुझाव संकलन कार्यक्रम गरिएको छ । पालिकामा लागु भएको निःशुल्क शिक्षालाई गुणस्तरीय तथा प्रभावकारी बनाउन पालिकाका सरोकारवालासँग गहनरुपमा छलफल गरिएको हो । नगरपालिकाका मेयर अजय थापाले भौतिक पूर्वाधारसँगै शिक्षाको गुणस्तर अभिवृद्धि गर्न प्रभावकारी योजना आवश्यक रहेको उल्लेख गरे । उनले नगरपालिकाभित्र निःशुल्क शिक्षा लागू भइसकेको भएपनि यसको प्रभावकारिता वृद्धि गर्न सबै पक्षको सहकार्य अपरिहार्य रहेको बताए ।

नगर उपमेयर शिवकुमारी थारुले शिक्षालाई अनिवार्य तथा गुणस्तरीय बनाउन नगरपालिकाको आयस्रोतलाई व्यवस्थित रूपमा परिचालन गर्नुपर्नेमा जोड दिइन् । पालिकाले शिक्षा क्षेत्रलाई पहिलो प्राथमिकतामा राखेर आगामी दिनमा थप रणनीतिक योजनाहरू लागू गर्ने उनको भनाइ छ । प्रसाशकीय अधिकृत बाबुराम पौडेलले शिक्षा क्षेत्र तुलनात्मक रुपमा सराहनीय रहेको दावी गरे । उनले पछिल्लो समय विद्यालय ड्रपआउटको संख्या बढेको जनाउँदै त्यसलाई रोक्न सरोकारवाला सबैले हातेमालो गर्नेगरी आगामी योजना अघि बढाउने बताए ।

नगरपालिकाले प्राप्त सुझावलाई समेटी शिक्षानीतिमा सुधार गर्दै आगामी शैक्षिक नीतिहरूलाई थप प्रभावकारी बनाउने जनाइएको छ । शिक्षालाई गुणस्तरीय तथा प्रभावकारी बनाउन कालिका स्वावलम्बन सामाजिक विकास केन्द्रको सहयोगमा आइतबार आयोजित कार्यक्रममा सरोकारवालाहरूबीच व्यापक अन्र्तक्रया गरिएको केन्द्रका इन्कल्यूसिस सुपभाइजर हेमराज थारुले जनाए । सुझाव संकलन कार्यक्रममा जनप्रतिनिधि, शिक्षक, अभिभावक तथा शिक्षा क्षेत्रका विज्ञहरूको उपस्थितिमा शिक्षाको गुणस्तर सुधारका लागि विभिन्न रणनीतिक उपायहरूबारे छलफल गरिएको थियो ।