खोज

बुटवल, १९ चैत ।

लायन्स क्लब अफ बुटवल सयपत्रीको आयोजनामा देवदह नगरपालिकाको आर्थिक सहयोगमा देवदहका चार सामुदायिक विद्यालयका ७० जना किशोरीहरूलाई दुई दिने आत्मरक्षा तालिम प्रदान गरिएको छ ।

कार्यक्रम क्लबका अध्यक्ष कमला बस्नेत कुँवरको अध्यक्षतामा सम्पन्न भएको थियो । डिष्ट्रिक्ट ३२५ पीका गभर्नर पुरुषोत्तम भक्त प्रधानाङ्गले कार्यक्रमको उदघाटन गरेका थिए । कार्यक्रममा देवदह नगरपालिका वडा नं. ५ का वडाध्यक्ष गणेश डुम्रेको पनि उपस्थिति रहेको थियो ।

केरवानी माविका अध्यक्ष विरेन्द्र पाण्डे, प्रिन्सिपल निर्मल ढुंगाना, प्रमुख प्रशिक्षक नवराज खरेल, सहप्रशिक्षक भीम ज्ञवाली, क्लबका संस्थापक अध्यक्ष प्रतिभा श्रेष्ठ, प्रथम उपाध्यक्ष एली क्षेत्री, कोषाध्यक्ष माया खड्का लगायतको पनि कार्यक्रममा उपस्थिति रहेको थियो। कार्यक्रम संयोजक शान्ती नेपाल रहेकी थिइन् ।

कार्यक्रममा बोल्दै क्लबकी अध्यक्ष कमला बस्नेत कुँवरले किशोरीहरूलाई आत्मरक्षा गर्न सक्षम बनाउन यो तालिम आवश्यक रहेको बताइन्। उनले आत्मरक्षा केवल हातहतियारको प्रयोगबाट मात्र नभई बोल्ने शैली, आवाज र हाउभाउको सही प्रयोगले पनि गर्न सकिन्छ भन्ने बुझाउन तालिम आयोजना गरिएको उल्लेख गरिन्।

लायन्स क्लब अफ बुटवल सयपत्रीले यसअघि पनि महिलाका लागि विभिन्न उद्यमशीलता तथा सशक्तीकरण कार्यक्रम सञ्चालन गरिसकेको र आगामी दिनमा पनि यस्ता कार्यक्रमलाई निरन्तरता दिने अध्यक्ष बस्नेतले बताइन्। कार्यक्रममा क्लबकी सचिव शान्ती नेपालले पनि आफ्नो धारणा राखेकी थिइन् ।