खोज

कपिलवस्तु, १९ चैत ।
पत्रकार हत्या र सञ्चार माध्यममा आक्रमणको बिरोधमा नेपाल पत्रकार महासंघ कपिलवस्तुले सरकारलाई ज्ञापनपत्र बुझाएको छ । रपोर्टिङ गरिरहेका बखत काठमाडौंमा मारिएका पत्रकार सुरेश रजकका हत्यारालाई कारबाहीको माग सहित नेपाल पत्रकार महासंघ कपिलवस्तु शाखाका उपाध्यक्ष नेतृत्वको टोलीले कपिलवस्तुका प्रमुख जिल्ला अधिकारी दिल कुमार तामाङ्ग मार्फत प्रधानमन्त्रीलाई ज्ञापनपत्र बुझाएका हुन ।

उपाध्यक्ष चापागाई सगै नेपाल पत्रकार महासंघका पुर्व अध्यक्ष मनोज पौडेल, निर्वतमान अध्यक्ष किरणमान बज्राचार्य, उपाध्यक्ष दिपा महत, सचिव शनिउल्लाह धोबी र प्रेस चौतारीका जिल्ला अध्यक्ष बाबुराम रायमाझीले संयुक्त रूपमा बुझाएको ज्ञापनपत्र मार्फत कार्यस्थलमा खटिरहेका पत्रकारको सुरक्षा ग्यारेन्टी गर्न सरकारको ध्यानाकर्षण गराईएको छ । पत्रकार हत्याको न्यायिक छानबिन गरी दोषीलाई कानुनी कारबाही गर्नु पर्ने, कान्तिपुर टेलिभिजन र अन्नपूर्ण पोस्ट सहितका सञ्चारगृहमा आगजनी, ढुंगामुढा र हुल हुज्जत गर्नेलाई पक्राउ गर्न तथा कार्यस्थलमा पत्रकारको सुरक्षा ग्यारेन्टी गर्न ज्ञापनपत्र मार्फत माग गरिएको हो । आफ्ना मागलाई सरकारले एक साता भित्र सम्बोधन नगरे कडा कदम चाल्न बाध्य हुने जनाईएको छ । ज्ञापनपत्र बुझदै प्रजिअ तामाङ्गले सञ्चारकर्मी र सञ्चार क्षेत्र माथी आक्रमण गर्नेलाई कारवाही गर्न सरकारले कुनै पनि कसर बाँकी नराख्ने बताए । उनले प्राप्त ज्ञापनपत्रलाई तत्कालै गृह मन्त्रालय हुदै प्रधानमन्त्री कार्यालयमा प्रेषित गर्ने प्रतिबद्धता जनाए ।