काठमाडौं ।
नेकपा माओवादी केन्द्रका अध्यक्ष पुष्पकमल दाहाल प्रचण्डले आज अपराह्न ४ बजे खुमलटार स्थित आफ्नो निजी निवासमा पदाधिकारी बैठक बोलाएका छन्। सचिव दीनानाथ शर्माले जानकारी दिइएका अनुसार, बैठकमा पछिल्लो राजनीतिक घटनाक्रम र स्थगित तराई मधेस जागरण अभियानसम्बन्धी विभिन्न विषयमा छलफल हुनेछ।
पूर्वराजा ज्ञानेन्द्र शाहको गणतन्त्र असफल भएको भनाइ र राष्ट्र बचाउन आफूलाई साथ दिन आग्रह गरेपछि राजावादीहरूको गतिविधि सक्रिय बनेको छ। यस बीच, माओवादी केन्द्रले १५ चैतमा राजधानीको तीनकुनेमा राजावादीहरूले गरेको हिंसात्मक गतिविधिपछि पूर्वराजालाई कारबाही गर्नुपर्ने समेत सार्वजनिक रूपमा जनाएको छ।
यस बैठकमा फागुन १२ गतेदेखि सुरु भएको पूर्व-पश्चिम हुलाकी मार्ग केन्द्रित जागरण अभियानका विषयमा पनि चर्चा हुनेछ। यो अभियान चितवनमा पुगेर स्थगित भएको थियो र अब यसलाई बिचबिचमा ‘ब्रेक’ लिँदै पुनः सञ्चालन गर्ने तयारी गरिएको सचिव शर्माले बताए।
