खोज

दाङ ,१८ चैत।
नेपाल पत्रकार महासंघ दाङले तीनकुनेमा चैत १५ गते भएको हिंसात्मक प्रदर्शनका क्रममा सञ्चारमाध्यम र सञ्चारकर्मीमाथि भएको आक्रमणप्रति गम्भीर आपत्ति जनाउँदै सरकारलाई तत्काल उचित कदम चाल्न माग गरेको छ । महासंघले प्रमुख जिल्ला अधिकारीमार्फत् सरकारलाई बुझाएको ज्ञापनपत्रमा घटनाको गहिरो अनुसन्धान गरी दोषीलाई कानुनी कारबाही गर्न, मृतक पत्रकार सुरेश रजकका परिवारलाई उचित क्षतिपूर्ति दिन तथा घाइते पत्रकारहरूको उपचारको प्रबन्ध गर्न माग गरिएको छ।

प्रदर्शनका क्रममा अराजक समूहले सञ्चारकर्मीलाई लक्षित गरी आक्रमण गरेको थियो । भिड़ियो खिच्ने क्रममा आगलागीमा परेर पत्रकार सुरेश रजकको मृत्यु भएको छ भने पत्रकार दिनेश गौतम गम्भीर घाइते भएका छन् । दाङ शखाका अध्यक्ष सन्तोष सुवेदी, उपाध्यक्ष नारायणी रजौरे, सचीव जे एन सागर, प्रदेश महासचिव पाण्डवप्रसाद शर्मा, सल्लाहकार दुर्गालाल केसी, सुदिप गौतम , सञ्चारिका समूह दाङका अध्यक्ष रञ्जिता अधिकारी लगायतले सहायक प्रमुख जिल्ला अधिकारी यज्ञबहादुर बुढालाई ज्ञापनपत्र बुझाएका छन् ।

ज्ञापनपत्र बुझ्दै सहायक प्रमुख जिल्ला अधिकारी बुढाले पत्रकारमाथिको आक्रमणप्रति गहिरो चिन्ता व्यक्त गर्दै घटनाको गम्भीर अनुसन्धान भइरहेको बताए । सञ्चारकर्मको सिलसिला सञ्चारकर्मी मारिनु दुःखद भएको बताएका छन् । दोषीमाथि कानुनी कारबाही गर्न कुनै सम्झौता नगर्ने प्रतिबद्धता जनाउँदै घाइते पत्रकारहरूको उपचार तथा क्षतिपूर्तिको विषयमा सम्बन्धित निकायसँग समन्वय गर्ने बताए । महासंघले सरकारको निर्णयअनुसार आगामी रणनीति तय गर्ने जनाएको छ।