खोज

बुटवल, १७ चैत ।
रूपन्देहीको सैनामैनाका सर्प उद्वार कर्ता चेत बहादुर सारु ‘सारु कान्छा’ ले समुदायमा पुगेर झुल वितरण गरेका छन् ।
गर्मीयाम सुरु भएपछि लामखुट्टे तथा सर्पको डसाईबाट बच्नको लागि भन्दै उनले समुदायमा पुगेर झुल वितरण गरेका हुन । शनिबार सैनामैना नगरपालिका वडा नं. १० सालझण्डीको कटानीमा गरिब तथा बिपन्न परिवारलाई सारु कान्छाले परिवार संख्याको आधारमा २०० झुल वितरण गरे ।

प्रत्येक वर्ष झुल वितरण गर्दै आएका उनले समुदायमा सर्पको डसाईबाट बच्ने उपायको बारेमा जनचेतना फैलाउँदै झुल वितरण गर्दै आएको बताए । विगत ५ वर्षदेखि सर्पको उद्वार गर्दै आएका सारु कान्छाले बैदेशिक रोजगारीको सिलसिलामा विदेशमा रहेका नेपाली र सर्प उद्वार ग¥र्दा पाएको रकमबाट प्रत्येक वर्ष झुल वितरण गर्दै आएको बताए ।
यस क्षेत्रमा पाईने विषालु सर्पहरू गोबन, बाघे, गनग्वारी र घोरघोराईजको बारेमा जानकारी दिँदै बच्ने उपायको बारेमा उनले जानकारी दिए । उनले अहिलेसम्म ५ सय भन्दा बढि सर्पको घर तथा गोठबाट उद्वार गरेर सुरक्षित बासस्थानमा छोड्दै आएका छन् ।

स्थानीय समाजसेवी तथा शिक्षक हुमनाथ अधिकारीले सारु कान्छाले सर्पको उद्वारसँगै सर्पबाट बच्ने उपायको बारेमा समुदायमा जनचेतना फैलाउँदै आएको बताए । विदेशमा रहेका नेपाली र सारु कान्छाको सहयोगबाट गरिब तथा बिपन्न परिवारलाई झूल वितरण गरिइएको उनले जानकारी दिए । सर्प उद्वार कर्ता चेत बहादुर सारु, दीपका काउचा, तुलसी पोखरेल, राजकुमार रेश्मी , प्रेमा पुलामी, गगन श्रेष्ठ र एमके ईकुमेन्टको आर्थिक सहयोगमा झुल वितरण गरिईएको अधिकारीले जानकारी दिए ।

स्थानीय निमा पुन काउचाले विगत २ वर्षदेखि लामखुट्टे तथा सर्पको डसाईबाट बच्नको लागि र गरिब तथा बिपन्न परिवारलाई जनचेतना फैलाउनको लागि कार्यक्रम गर्दै आएको जानकारी दिए । अर्का स्थानीय नवराज खनालले सारु कान्छाले सर्प उद्वारको काम सुरु गरेपछि यस क्षेत्रमा सर्प मार्ने क्रम घट्दै गएको र घरमा आएका सर्पलाई उद्धार हुने गरेको बताए । स्थानीय हर्कबहादुर बस्नेतले सर्पको डसाईबाट पीडित भएर पनि सारु कान्छाले यस क्षेत्रमा सर्पको उद्धार गर्दै र जनचेतना फैलाउँदै आएको चर्चा गरेका थिए ।