खोज

सल्यान, १७ चैत ।

नेपाल निजामती कर्मचारी संगठन कर्णाली प्रदेश कार्यसमितिको प्रथम पदाधिकारी बैठकले सात बँुदे कुपिण्डेदह घोषणापत्र जारी गरेको छ । सल्यानको बनगाड कुपिण्डे नगरपालिका वडा नम्बर ८ मा अवस्थित धार्मिक, साँस्कृतिक र ऐतिहासिक महत्वको रूपमा रहेको नेपालकै प्रमुख पर्यटकीय गन्तव्य मध्येको एक कुपिण्डे दहमा सम्पन्न बैठकले घोषणापत्र जारी गरेको हो ।

घोषणापत्रमा दैनिक कार्यालयमा आउने सेवाग्राहीप्रति शिष्टाचारको रुपमा “आफैबाट पहिलो नमस्कार” अभियान सञ्चालन गरी “सरल सरकारः सहज सेवा” को मान्यतालाई आत्मसात गर्दै सार्वजनिक सेवा प्रवाह गर्न सरोकारवालामा अनुरोध गर्ने उल्लेख गरिएको छ । सहभागितामूलक सेवा तथा सुशासन प्रवद्र्धनका लागि र “सेवाग्राही लाईनमा होइन अनलाइनमा” भन्ने ध्येयलाई अवलम्बन गर्न सरोकारवाला सबैमा अनुरोध गर्ने पनि बैठकको निर्णय रहेको छ ।

यसैगरी संघ, प्रदेश र स्थानीय तहमा कार्यरत सबै राष्ट्रसेवक कर्मचारीहरुको सेवाको सुरक्षा, वृत्ति विकास, समय सापेक्ष सेवा सुविधा वृद्धि र उच्च मनोभावका साथ सेवा प्रवाह गर्ने कार्य वातावरण सिर्जना गर्न माग गरिएको कर्णाली प्रदेश कार्यसमिति अध्यक्ष राजेश आचार्यले जानकारी दिए ।

सार्वजनिक प्रशासनलाई समय सापेक्ष परिस्कृत बनाउँदै आम नागरिकले अनुभुत गर्ने गरी शीघ्र सेवा, तीब्र विकासको अभियान सञ्चालन गर्ने, पछिल्लो समयमा पेशाकर्मीहरुमाथि कार्यस्थलमै हुने गरेका अभद्र, अवाञ्छित र अमर्यादित खालका गतिविधि अन्त्य गर्दै सुरक्षित र मर्यादित वातावरणमा उच्च मनोबलका साथ सेवा प्रवाह गर्ने उचित कार्य वातावरण सिर्जना गर्न तीनै तहका सरकारलाई अनुरोध गर्ने पनि निर्णय गरिएको छ ।

गुणस्तरीय सार्वजनिक सेवा प्रवाहका लागि सार्वजनिक प्रशासनमा ज्ञान, सीप, क्षमता र दक्षतायुक्त जनशक्ति व्यवस्थापनका गर्न समय सापेक्ष तालिम, प्रशिक्षण लगायतका क्रियाकलाप सञ्चालन गरी उच्च क्षमतामा काम गर्ने वातावरण सिर्जना गरी सामाजिक न्याय, दिगो शान्ति, सुशासन र विकास मार्फत “समृद्ध नेपालः सुखि नेपाली” को राष्ट्रिय आकांक्षा पुरा गर्न आधार सिर्जना गर्न पहल गर्ने र पेशागत हक हित र अधिकारको रक्षाका निम्ति ट्रेड युनियन अधिकारको सुनिश्चिता गर्न सरकारसँग माग गर्दै जिम्मेवारी र कर्तव्यबोधका साथ सेवा प्रवाह मार्फत कर्णाली प्रदेश सरकारको “समृद्ध कर्णालीः सुखारी कर्णालीबासी” को अभियानलाई सार्थकता दिने प्रतिवद्धता घोषणापत्रमा गरिएको छ ।

वृहत बनभोज तथा क्यालेण्डर विमोचन

यसैविच सो अवसरमा नेपाल निजामती कर्मचारी संगठन, जिल्ला कार्यसमिति सल्यानको आयोजनामा बृहत बनभोज तथा २०८२ सालको क्यालेन्डर विमोचन कार्यक्रम पनि शनिबार कुपिण्डे दहमा सम्पन्न भएको छ । सो अवसरमा नेपाल स्वास्थ्यकर्मी संघ सल्यानका सह–सचिव तथा छत्रेश्वरी गाउँपालिकाका स्वास्थ्य शाखा प्रमुख गणेशमान डाँगीले पद त्याग गरी नेपाल निजामती कर्मचारी संगठनमा प्रवेश गर्नुभएको छ । लोकसेवा आयोग पास गरिसकेका कर्मचारीहरूलाई संगठनमा आवद्ध गरियो र प्रेम बहादुर डाँगीको संयोजकत्वमा तीन सदस्यीय सल्लाहकार समिति गठन गरिएको संगठनका जिल्ला कार्यसमिति अध्यक्ष डिल्ली बहादुर घर्तीले जानकारी दिए ।

सो क्रममा संगठनका लामो समयका सदस्य, कोषाध्यक्ष, कार्यवाहक अध्यक्ष र अध्यक्ष पदमा रही संगठनको श्रीवृद्धिमा महत्वपूर्ण योगदान पु¥याएको भन्दै ध्रुव बहादुर खत्रीलाई सम्मान गरिएको थियो । कार्यक्रममा नेकपा (एमाले) सल्यान जिल्ला उपाध्यक्ष एवम् जनवर्गीय संगठन विभाग प्रमुख तथा छत्रेश्वरी गाउँपालिका अध्यक्ष ओजबहादुर बुढाथोकीले कर्मचारीहरूको एकता, संगठनात्मक सुदृढीकरण तथा पेशागत हित संरक्षणका लागि काम गर्नुपर्नेमा जोड दिए ।

कार्यक्रममा नेपाल निजामती कर्मचारी संगठनका केन्द्रीय सल्लाहकार मोहन गिरी, कर्णाली प्रदेश इन्चार्ज तुलाराम गिरी, सह–इन्चार्ज टंक लामिछाने, केन्द्रीय अनुशासन आयोगका सचिव शंकर भट्टराई, केन्द्रीय सदस्य प्रकाश खड्का, कर्णाली प्रदेश कार्यसमिति अध्यक्ष राजेश आचार्य, महासचिव प्रकाश शर्मा लगाएतको सहभागिता रहेको थियो ।

यस्तै संगठनका सुर्खेत जिल्ला कार्यसमिति अध्यक्ष सीता कडेल, पेशागत महासंघ सल्यानका अध्यक्ष विष्णु भण्डारी, राष्ट्रिय स्वास्थ्यकर्मी महासंघ सल्यानका अध्यक्ष लोक बहादुर बस्नेत, नेपाल बुद्धिजीवी परिषद सल्यानका अध्यक्ष मोहन खड्का लगायत संघ, प्रदेश र स्थानीय तहमा कार्यरत कार्यालय प्रमुख एवं संगठक कर्मचारीहरूको उल्लेख्य उपस्थिति रहेको थियो ।