खोज

बुटवल, १७ चैत ।
अर्घाखाँची ढाकावाङ्ग–रूपन्देही सम्पर्क समाजले नयाँ वर्ष २०८२ सालको भित्ते पात्रो (क्यालेन्डर) बिमोचन तथा शुभकामना आदानप्रदान कार्यक्रम गरेको छ । कार्यक्रमको भूमिकास्थान–रूपन्देही सम्पर्क समाजका अध्यक्ष लक्ष्मण बेलबासेले शुभारम्भ गरेका हुन । शुुभारम्भ गर्दै अध्यक्ष बेलबासेले स्थापना भएको छोटो समयमै थुप्रै रचनात्मक काम गर्न सफल भएको भन्दै समाजको प्रशंसा गर्दै सम्पर्क समाज भनेको के हो भन्ने उदाहरण ढाकावाङ्ग–रूपन्देही सम्पर्क समाज रहेको बताए । बेलबासेले सम्पर्क समाज ढाकावाङ्गबाट रूपन्देहीमा आएकाहरू बीच आपसी पीर, मर्का, सुःख र दुःख साट्ने चौतारीका रूपमा स्थापित भएको समेत बताए ।

कार्यक्रममा संस्थाका सल्लाहकार प्रेम प्रसाद पौडेल, नयाँगाउँ खानेपानी सरसफाइ तथा उपभोक्ता समिति बुटवल १२, १३ का सहसचिव ढुण्डिराज खनाल लगायतले बोल्दै समाजलाई सशक्त र सबै सदस्यको अपनत्व हुने खालको बनाउनुपर्नेमा जोड दिएका थिए । कार्यक्रममा समाजका अध्यक्ष कृष्णप्रसाद खनालले भूमिकास्थान नगरपालिका वार्ड नम्बर १ र २ ढाकावाङ्गबाट विभिन्न पेसा, व्यवसाय तथा अध्ययनको सिलसिलामा रूपन्देही आएर बसेकाहरूलाई गोलबद्ध गर्दै २०८० जेठ १३ गते गठन भएको समाजले क्यालेन्डर प्रकाशनसँगै, रक्तदान, तीजमा तीज मिलन, तिहारमा मौलिक कला र संस्कृतिको संरक्षण गर्ने मौलिक देउसी/भैलो, विभिन्न समयमा विपत्तिमा परेकाहरूलाई आर्थिक सहयोग लगायत बिभिन्न रचनात्मक कामहरू गर्दै आएको बताए । यस्तै समाजले विपद जोखिम कोष स्थापना गरेको र उक्त कोषमा संस्थाका अग्रज तथा नयाँगाउँ खानेपानी संस्थाका सहसचिव दुण्डीराज खनालले १० हजार रूपैयाँ जम्मा गरेको कार्यवाहक सचिव टेकराज भुसालले जानकारी दिए ।

अध्यक्ष कृष्णप्रसाद खनालको अध्यक्षता, कार्यबाहक सचिव टेकराज भुसालको संचालन तथा उपाध्यक्ष युवराज खनालको स्वागत मन्तव्यमा सम्पन्न कार्यक्रममा गत फागुन २४ गते सम्पन्न नयाँगाउँ खानेपानी उपभोक्ता तथा सरसफाइ संस्थाको निर्वाचनमा संस्थाका अग्रज सदस्यहरू ढुण्डिराज खनाल सहसचिव तथा घनश्याम पौडेल, अन्जना खनाल (पौडेल) र मिना खनाल (आचार्य) सदस्यमा निर्वाचित भएकोमा समाजले सम्मान–पत्रले सम्मान गर्दै सफल तथा रचनात्मक कार्यकालको समेत शुभकामना दिएको थियो ।