खोज

काठमाडौँ ।

नेपाल प्रहरीले शुक्रबार राजावादीहरूको हिंसात्मक प्रदर्शनका क्रममा पक्राउ गरिएका १०५ जना प्रदर्शनकारीहरूको ‘स्क्रिनिङ’ सुरु गरेको छ । प्रदर्शनमा क्रममा भएको आगजनी, तोडफोड, लुटपाटलगायतमा उनीहरूको संलग्नता यकिन गर्ने काम प्रहरीले गरिरहेको हो ।

जिल्ला प्रहरी परिसर काठमाडौँका अनुसार पूर्वराजा ज्ञानेन्द्र शाहका समर्थकहरूले तीनकुने क्षेत्रमा गरेको आन्दोलनका क्रममा एकजना पत्रकारसहित दुई जना मारिएका छन् । त्यस्तै, नेपाल प्रहरीतर्फ ५३ जना र सशस्त्र प्रहरीतर्फ २२ जना गरी कूल ७५ जना घाइते भएका छन् ।

प्रदर्शनकारीले तीनकुनेको अन्नपूर्ण कम्प्लेक्स, मार्बल हाउस, प्रहरी प्रभाग कोटेश्वर, एकीकृत समाजवादीको कार्यालयमा तोडफोड गर्नुका साथै कोटेश्वरस्थित भाटभटेनीमा लुटपाटसमेत गरेका थिए । उनीहरूले १४ स्थानमा आगजनी, ९ वटा संस्था र कार्यालयमा तोडफोड र १ स्थानमा लुटपाट मच्चाएका थिए ।  उनीहरूले ९ वटा सरकारी सवारी साधन र ६ वटा निजी सवारी साधनमासमेत क्षति पुर्‍याएका थिए ।

परिसरका एसएसपी विश्व अधिकारीका अनुसार प्रहरीले यतिबेला घटनाको भिडियो, सिसिटिभी फुटेजलगायत प्रमाणहरूको आधारमा पक्राउ परेकाहरूको संलग्नता यकिन गरिरहेको छ । पक्राउ परेकाहरूसँग सोधपुछ पनि भइरहेको उनले बताए ।

घटनालाई हिंसात्मक बनाउन उक्साएको आरोप प्रहरीले राप्रपाका उपाध्यक्ष रवीन्द्र मिश्र, महामन्त्री धवलशमशेर राणा, स्वागत नेपाल, सेफर्ड लिम्बु, सन्तोष तामाङ र आफूलाई धर्मगुरु बताउने पुष्कर खतिवडालाई पक्राउ गरिसकेको छ । आन्दोलनको कमाण्डरको जिम्मेवारी पाएका दुर्गा प्रसाईं भने फरार रहेका छन् ।

पक्राउ परिएकाहरुलाई आइतबार म्याद थपका लागि अदालतमा उपस्थित गराइने एसएसपी अधिकारीको भनाई छ । उनीहरूलाई के–कस्ता मुद्दा चलाउने भन्ने विषयमा सरकारी वकिलसँग छलफल भइरहेको पनि उनले जानकारी दिए । ‘आगजनी, सार्वजनिक शान्ति खलल पुर्‍याएको, लुटपाटलगायत विभिन्न विषयहरू आकर्षित हुनसक्छन्,’ रातोपाटीसँग कुराकानी गर्दै उनले भने ।