दाङ,१६ चैत ।
दाङका पत्रकारहरूले पत्रकार सुरेश रजकको हत्या र सञ्चारगृहमाथि भएको आक्रमणको विरोधमा आज घोराहीमा बिरोध प्रदर्शन गरेका छन् ।
नेपाल पत्रकार महासंघ दाङ शाखाको आयोजनामा जिल्लाका पत्रकारहरू भेला भई विरोध सभा आयोजना गरेका हुन् ।
हिजो काठमाडौंको तीनकुनेमा राजावादी प्रदर्शनका क्रममा एक घरमा एभिन्यूज टेलिभिजनका पत्रकार सुरेश रजकको जलेर मृत्यु भएको थियो । सोही आन्दोलनका क्रममा विभिन्न सञ्चारगृहमाथि आक्रमणसमेत भएको थियो । सोही घटनाको विरोधमा दाङका पत्रकारहरूले आज सभा गरेका हुन् ।
प्रदर्शनको क्रममा पत्रकारहरूले ‘पत्रकारिता दबाउने प्रयास बन्द गर, स्वतन्त्र प्रेसको सम्मान गर, सत्य बोल्ने कलम रोकिन्न’ जस्ता नारा लेखिएको नारा तय गरेका थिए । पत्रकार महासंघ दाङ शाखाको भबन अगाडि बिरोध सभामा नेपाल पत्रकार महासङ्घका केन्द्रीय सदस्य लिला शाह, दाङ जिल्लाका पूर्व अध्यक्ष प्रताप रेग्मी , पत्रकार महासंघ लुम्बिनी प्रदेश महासचिव पाण्डवप्रसाद शर्माले सम्बोधन गर्दै घटनामा संलग्न दोषीलाई तत्काल पक्राउ गरी कानूनी कारवाही गर्न, पत्रकार सुरेश रजकका परिवारलाई उचित राहत उपलब्ध गराउन र घाइते पत्रकारको उपचारको व्यवस्था गर्न माग गरेका थिए ।
आज नेपाल पत्रकार महासङ्घको स्थापना दिवस भएकाले बेलुका दीप प्रज्वलनको तयारी थियो, तर हिजोको घटनापछि विरोध कोण सभा आयोजना गर्नुपर्ने स्थिति आएको महासङ्घका दाङ सचिव जे एन सागरले जानकारी दिए ।
महासंघ दाङ शाखा अध्यक्ष सन्तोष सुवेदीले राज्यलाई सचेत गराउँदै यस्ता हिंसात्मक गतिविधिहरूको पुनरावृत्ति रोक्न कडा कदम चाल्नुपर्ने माग गरेका छन् । उनले भने पत्रकारहरूको हक, हित, सुरक्षा तथा अभिव्यक्ति स्वतन्त्रताको रक्षा गर्दै पत्रकार महासङ्घले स्वतन्त्र पत्रकारिताको रक्षा गर्न निरन्तर लागिरहने प्रतिवद्धता व्यक्त गरेका छन् ।
२७ मंसिर २०८२, शनिबार
