खोज

दाङ ,११ चैत । दाङको सांग्रिला प्लाइ उद्योगमा आइतबार रातिदेखि भएको आगलागीले उद्योगको कच्चा पदार्थ र मेसिन पूर्णरूपमा जलेर नष्ट भएको छ । जिल्लामा पर्याप्त वारुणयन्त्र नभएका कारण आगो निभाउन १८ घण्टाभन्दा बढी समय लाग्यो । ७ बिघा क्षेत्रफलमा फैलिएको उद्योगमा भएको आगलागीबाट ५० करोडभन्दा बढीको क्षति भएको प्रारम्भिक अनुमान छ । आगोले उद्योग आसपास रहेका दुई वटा घर र एउटा गोठमा सामान्य क्षति पु¥याएको छ ।

आइतबार मध्यरात मस्त निद्रामा थिए । स्थानीय गिरिराज रोका चर्पी जाने भनेर १ बजे बाहिर निस्कीएका थिए । प्लाइ उद्योगसँगै सटेको घर भएका रोका बाहिर निस्कँदा उद्योगमा दनदनी आगो बलिरहेको थियो । रोकाको होस हवास उड्यो । उनले दौडदै उद्योगका सुरक्षा गार्डलाई खबर गरे ।

हतार हतार विभिन्न ठाउँमा खबर गर्न थालियो । पालिकासँग रहेका दमकललाई खबर भयो । रातको समय साढे दुई बजे पहिलो दमकल आइपुग्यो । नेपाल प्रहरी पनि आगलागी स्थलमा पुग्यो । अन्य सुरक्षा निकाय सशस्त्र प्रहरी नेपाली सेना पनि थपिए । आगोले झन उग्ररुप देखाइसकेको थियो ।

उद्योगमा रहेको चिम्नी पड्किने हल्लाले केहीबेर स्थानीयहरूको भागाभाग भयो । उद्योगसँगै रहेका घरहरूमा आगो फैलिने जोखिम रहेका कारण सुरक्षाकर्मीको ध्यान त्यतातर्फ लाग्यो । दमकल र सुरक्षाकर्मी थपिँदै गए । घरबाट सामान बालबच्चा लिएर मानिसहरू खुला चौरमा आधारात कटाए । सानो पूँजीबाट २०६३ सालदेखि सुरु गरेको प्लाइ उद्योग जलेर खरानी भयो ।

१८ वर्ष पहिले स्थापना भएर विकसित हुँदै गएको उद्योगमा दैनिक ७ सय जनाले रोजगारी पाएका थिए । उत्पादित सांग्रिला प्लाइ नेपालका सबैजसो जिल्लामा पुग्थ्यो पछिल्लो दुई वर्षदेखि भारत–चीन निर्यात हुँदै आएको थियो । आफैंमा ठूलो उद्योग र त्यहाँ रहेका ज्वलनशील प्लाइ, काठजन्य वस्तु, मेसिन तथा औजारहरू रहेका कारण सल्किएको आगो निभाउन समयमै सम्भव भएन । जिल्लामा पर्याप्त मात्रामा दमकल नभएकै कारण कपिलवस्तु, बाँके र बर्दियाबाट दमकल मगाउनु पर्यो । ५० करोडमाथिको क्षति भएको प्रारम्भिक अनुमान छ ।

गए राति भएको यो आगलागीका कारण उद्योगीले करोडौं रुपैयाँ गुमाएका छन् भने प्रत्यक्ष ७ सय जनाले रोजगारी गुमाएका छन् । उद्योग आसपास रहेका दुई वटा घर र एउटा गोठमा सामान्य क्षति भएको छ । बाह्य जोखिम टरे पनि उद्योगमा लागेको आगो पूर्णरूपमा अझै नियन्त्रणमा आउन सकेको छैन ।