काठमाडौँ ।
सरकारले पत्रकारहरूको लागि निःशुल्क दुर्घटना बीमा कार्यक्रमअन्तर्गत ४६ जना पत्रकारको बीमा गराएको छ। सूचना तथा प्रसारण विभागले यस वर्ष ७ लाख रुपैयाँ बराबरको दुर्घटना बीमा ४६ जना पत्रकारलाई गराएको हो।आइतबार विभागकी निर्देशक पूर्णिमा उपाध्यायको अध्यक्षतामा पत्रकार दुर्घटना बीमा छानबिन र मूल्याङ्कन समितिको बैठक बसेर बीमाका लागि आवेदन दिएका ४६ जना पत्रकारको नाम चयन गरी बीमा गराउने निर्णय गरिएको जानकारी विभागले दिएको छ। उपाध्यायका अनुसार, विभागले दुई पटक आवेदन माग्दा ४७ जना पत्रकारले आवेदन दिएका थिए, जसमा ४६ जनाले सबै योग्यताहरू पूरा गरेका थिए र तिनीहरूको दुर्घटना बीमा गरियो।
यो बीमा एक वर्षका लागि लागु हुने बताइएको छ। पहिलोपटक ३७ जनाले आवेदन दिएपछि दोस्रो पटक ९ जनाले थप आवेदन दिएका थिए।नेपाल पत्रकार महासंघले भने बीमा कार्यक्रमको सहभागिता घट्दै गएकोमा चिन्ता व्यक्त गरेको छ। महासंघका सचिव रमेश खतिवडाले भने, “केही वर्ष अघि यो कार्यक्रमअन्तर्गत एक हजार पत्रकारको बीमा गरिएको थियो, अहिले भने यो संख्या ४६ मा झर्नु दुःखद छ।” उनले प्रदेश सरकार र स्थानीय तहहरूले पनि पत्रकारहरूको लागि बीमा कार्यक्रम सुरू गरेकाले यसमा सहभागिता घटेको बताए।पत्रकारहरूको दुर्घटना बीमा कार्यक्रमलाई अझ प्रभावकारी बनाउन सूचना विभाग र सञ्चार मन्त्रालयसँग छलफल गर्ने योजनामा रहेको उनले बताए।
