खोज

बुटवल, ९ चैत । ईलिट बिजनेश स्टाफिङ र जितगढी रोयल क्रिकेट क्लबका बिचमा सहकार्यको सम्झौता भएको छ । क्रिकेटमा योगदान दिदै आएको जितगढी रोयल क्रिकेट क्लबलाई वार्षिक सहयोग गर्ने गरि स्टाफिङसंग दुई वर्षका लागि सहकार्य गर्ने सम्झौता भएको हो। ईलिट बिजनेश स्टाफिङका सिईयो विष्णु कार्की र क्लबका अध्यक्ष गंगाराम सुनार बिच सम्झौतापत्रमा सम्झौता भएको हो ।

कार्यक्रममा बुटवल उपमहानगरपालिका वडा नं १३ का वडाअध्यक्ष नारायण प्रसाद पुनले वडाबाट निरन्तर सहयोग गर्दै आएको र आगामी दिनमा समेत सहयोग गर्ने प्रतिवद्घता जनाए । कार्यक्रममा क्लबका अध्यक्ष गंगाराम सुनारले क्रिकेट खेल र खेलाडीको विकास गर्ने लक्ष्यसहित क्लब स्थापना भएको बताए । क्रिकेटप्रतिको माया र लगावका कारण आफू निरन्तर सेवाको भावका साथ एकेडेमी चलाउदै आएको उनले बताए । स्थानिय वडाको पहलमा क्रिकेट अभ्यास गर्न मैदान निर्माण गरेको उनले बताए । बुटवलमा नै निशुल्क क्रिकेट सिकाउने पहिलो एकेडेमीका रुपमा आफुहरु रहेको उनले दाबी गरे ।

जिल्लामा क्लब ए डिभिजन लिग समेत खेल्दै आएको उनले बताए । स्टार खेलाडीहरु कुशल भ्रुतेल, सन्दिप जोरा लगायतका धेरै खेलाडी अनुबन्ध गरेर प्रतियोगितामा सहभागी भएको उनले बताए । हाल एकेडेमीमा ढलान गरेको पिचमा अभ्यास भएको उनले बताए । टफ पिचको आवश्यकता रहेको छ । यो बनाउन रोलर, पिच, ड्रेसिङ रुम, पिउनेपानी, शौचालय लगायत अभाव रहेको उनले बताए ।

कार्यक्रममा ईलिट बिजनेश स्टाफिङका सिईयो विष्णु कार्कीले क्रिकेट विकासमा आफुहरु जोडिन पाउदै निककै खुशी ब्यक्त गरे । अष्ट्रेलियामा क्रिकेट एशोसियसनलाई नाईस ग्रुपमार्फत सहयोग गर्दै आएको भन्दै उनले अष्ट्रेलियाकै एक जना नेपाली खेलाडीबाट क्लबको बारेमा जानकारी पाएर सहयोग गर्न तयार भएको बताए। क्रिकेट सिक्ने उमेरमा ब्यवहारिक ज्ञान धेरै उपयुक्त हुने बताए ।

कार्यक्रममा बुटवल क्रिकेट विकास समितिका कार्यबाहक अध्यक्ष रोमित बज्राचार्यले क्रिकेट खेलको जग बसाउने काममा सुनारको योगदानबारे चर्चा गर्दै खेलकुदमा पुर्वाधार र विकासमा सहयोग अभाव रहेको दुखेसो गरे ।

कार्यक्रममा नेपाल खेलकुद पत्रकार मंचका रुपन्देहीका अध्यक्ष सुमन अधिकारीले क्रिकेट विकासमा निजि क्षेत्रको अगुवाईमा भएको बताए । क्रिकेटको क्रेज, अवसरलाई सदुपयोग गर्ने समय आएको उनले बताए । कार्यक्रममा स्टाफिङका सिटिओ श्रवण पौडेल, जितगढी क्रिकेट क्लबका सचिव नवल गुरुङले शुभकामना दिए ।