खोज

बुटवल, ८ चैत । स्वस्थ्य हबका रुपमा पहिचान बनाउदै गएको रुपन्देहीमा विशिष्टिकृत सेवा भित्राउने होड नै छ । यसै क्रममा हाडजोर्नी विषयमा विशेषज्ञ सेवा दिने गरि रुपन्देही डेक्सा स्क्यान सेन्टरले एक विशेष प्रकारको एक्स–रे उपकरण डेक्सा स्क्यान मेशिन भित्राएको हो । शुक्रबार सेन्टरले सिएमई कार्यक्रम गरि लुम्बिनी प्रदेशका विभिन्न जिल्लामा रहेका विशेषज्ञ चिकित्सकहरुलाई मेशिनबारे जानकारी दिएको छ ।

कार्यक्रममा हाडजोर्नी रोग विशेषज्ञ डा सन्जिव आचार्य डेक्सा स्क्यान मेसिनबारे जानकारी दिदै रुपन्देहीमा नै धेरै विरामीहरुलाई यसबाट उपचारमा सहजता मिल्ने बताए । ‘डेक्सा स्क्यान एक प्रकारको इमेजिङ परीक्षण हो ।’– उनले भने । यसबाट शरीरको हड्डीको घनत्व र शरीर संरचना मापन तथा हड्डीको खनिज घनत्व र शरीरको बोसो तथा मांसपेशीको प्रतिशत निर्धारण गर्न मद्दत मिल्ने उनले बताए । ढाड, नितम्ब वा सम्पूर्ण शरीरको हड्डीको अवस्था जाँच गर्न तथा ओस्टियोपोरोसिसको जोखिम पत्ता लगाएर उपचार गर्न मद्दत मिल्ने उनले बताए ।

एचएमटी ग्रुपले विश्वका विभिन्न नाम चलेका विभिन्न कम्पनीहरुबाट उत्पादित स्वास्थ्य उपकरणहरु उपलब्ध गराउदै आएको छ । एचएमटी ग्रुपले रेडियोलोजी सेग्मेन्टमा निदान मेडि सोलुसनमार्फत उपकरण उपलब्ध गराउने र बिक्रीपछिको सेवा दिने गरेको सोलुसनका मिना बुढाथोकीले बताईन । सात वटै प्रदेशमा विक्रिपछिको सेवालाई मध्येनजर गरि दक्ष जनशक्ति र प्रविधि राखिएको उनले बताए । होलोजिक कम्पनीका सिवा नायरले अनलाईन मार्फत मेशिनको बारेमा जानकारी दिदै नया युगको नया प्रविधि भएको बताए । मेशिनको उपयोगिता र यसबाट बिरामीहरुले लिने फाईदाहरुबारे प्रकाश पारे ।

कार्यक्रममा महिला तथा प्रसुति रोग विशेषज्ञ डा बिबि रावतले मेसिन बहुउपयोगी भएको बताए । हड्डी खिइँदै गएको, हड्डी टुक्रिने जोखिम र अस्थिओपोरोसिस भएको वा नभएको जस्ता समस्याहरू पत्ता लगाएर समयमा नै उपचार अघि बढाउन सकिने उनले बताए ।

कार्यक्रममा सेन्टरका संचालक दिपु केसीले बुटवललाई स्वास्थ्यको हबका रुपमा चिनाउने गरि विशिष्टिकृत सेवामा आफुहरु लागेको बताए । युवाहरुको अगुवाईमा करीब १ करोड रुपैया लागतको मेशिन भित्राएर न्यून शुल्कमा सेवा दिन लागेको बताए ।

कार्यक्रममा संचालक महेश शर्माले समयसापेक्ष प्रविधिमैत्री मेशिन भित्राएर बुटवलबासीलाई सेवा दिन लागेको बताए । स्क्यान प्रक्रिया छिटो (सामान्यतया १० देखि ३० मिनेट) र पीडारहित हुने उनले बताए ।

कार्यक्रममा बुटवल रुपन्देही, कपिलवस्तु, नवलपरासी सहितका विभिन्न जिल्लाका गाईनोक्लोजिस्ट, अर्थोपेडिक, फिजिसियन, बाथरोग विशेषज्ञ, न्युरोसर्जन, सर्जरी चिकित्सकहरुको सहभागिता रहेको संचालक रमेश लम्सालले बताए ।