खोज

जितपुर, ८ चैत ।

बाणगंगा नगरपालिका पिपरामा पोषणमैत्री वडा निर्माणका लागि वडास्तरीय अभिमुखीकरण कार्यक्रम सम्पन्न भएको छ । बिहीबार वडा न. २ को सभाहलमा अभिमुखीकरण कार्यक्रम सम्पन्न भएको हो ।

कार्यक्रमलाई सम्बोधन गर्दै नगरप्रमुख चक्रपाणी अर्यालले वडा नं. ५ र ८ लाई अघिल्लो वर्ष पोषणमैत्री घोषणा गरिएको जानकारी दिँदै यस वर्ष वडा नं. २, ४ र ९ लाई सो सूचीमा समावेश गर्ने तयारी भइरहेको बताए । उनले आगामी आर्थिक वर्षभित्र नगरपालिकाका सबै ११ वटा वडालाई पोषणमैत्री घोषणा गर्ने लक्ष्य रहेको उल्लेख गरे। पोषणमैत्री घोषणालाई दिगो बनाउन स्रोतसाधनको व्यवस्थापन नगरपालिका स्तरबाट हुने पनि उनले आश्वासन दिए ।

प्रमुख प्रशासकीय अधिकृत भक्तिराम मरासिनीले घर घरमा पोषणसम्बन्धी जनचेतना अभिवृद्धि आवश्यक रहेको बताउँदै, विद्यालयमा प्रदान गरिने पोषणयुक्त खाजाको प्रभावकारिताबारे निगरानी गरिने जानकारी दिए ।

वडा नं. २ का वडाध्यक्ष विष्णुप्रसाद पौडेलले वडा विकास र सचेतनाको दृष्टिकोणले अग्रस्थानमा रहेको दाबी गर्दै, वडा नं. २ लाई पोषणमैत्री र पूर्ण सरसफाईयुक्त वडा घोषणाका लागि आवश्यक तयारी पूरा भइसकेको बताए। उनले पिपरा अस्पतालमा सेवाप्रवाह उच्च भए पनि डाटा अभिलेख कमजोर रहेको भन्दै सुधारका लागि निर्देशनसमेत दिए।

स्वास्थ्य शाखा प्रमुख ठगराज पौडेलले पोषणमैत्री वडा घोषणाका लागि ४९ वटा मापदण्ड पूरा गर्नुपर्ने जानकारी दिँदै, स्वास्थ्य गतिविधिहरूलाई प्राथमिकताका साथ सञ्चालन गरिएको बताए।कार्यक्रममा पोषण तथा खाद्य सुरक्षा सहजीकरण समिति र विभिन्न सरोकारवालाहरूको सहभागिता रहेको थियो ।