खोज

चन्द्रौटा, ०८ चैत ।
नेपाल मदिरा व्यवसायी महासंघका केन्द्रीय अध्यक्ष सोनम शेर्पाले मदिरा व्यवसायको समस्या सरकारसँग समाधान नहुने बताएका छन् । कपिलवस्तु मदिरा व्यवसायी संघको १० औँ वार्षिक साधारणसभामा बोल्दै उनले सरकारको नीति व्यवसायीमाथि कठोर हुँदै गएको र समस्या समाधान गर्नेभन्दा उल्टो झन् कठिन परिस्थिति सिर्जना गरिरहेको आरोप लगाए ।शिवराज नगरपालिका–३, खरेन्द्रपुरमा आयोजित कार्यक्रममा महासंघका अध्यक्ष शेर्पाले सरकार विभिन्न बहाना बनाएर मदिरा व्यवसायलाई निरुत्साहित गरिरहेको उल्लेख गरे । उनले मदिरा व्यवसायले सरकारलाई ठूलो मात्रामा कर तिर्ने भएकाले आर्थिक क्षेत्रमा यसको महत्वपूर्ण योगदान रहेको बताए । विदेशी तथा कर छली गरी भित्रिएका मदिरालाई कानुनी दायरामा ल्याउनुपर्ने उनको माग छ ।

देशको आर्थिक अवस्था जटिल बन्दै गएको बताउँदै अध्यक्ष शेर्पाले व्यवसायीहरू अहिले सङ्कटमा रहेको बताए । मदिरा व्यवसायलाई कानुनी संरक्षण दिएमा अर्थतन्त्रलाई टेवा पुग्ने उनले धारणा राखे । यसैबीच आन्तरिक राजस्व कार्यालय कृष्णनगरका प्रमुख पिम्बर न्यौपानेले प्रत्येक मदिराजन्य उत्पादनमा राजस्व कार्यालयको स्टिकर लगाउन अनिवार्य गरिएको बताए । विदेशी मदिरालाई रोक्न सरकार मात्र नभई सबै व्यवसायीहरूको साथ आवश्यक रहेको उनले उल्लेख गरे ।त्यस्तै कपिलवस्तु मदिरा व्यवसायी संघका संस्थापक तथा सल्लाहकार घनश्याम पौडेलले ग्रामीण भेगका व्यवसायीलाई पनि संघमा समेट्नुपर्ने बताए । पछिल्लो समय देशको राजनीतिक अस्थिरता तथा आर्थिक मन्दीका कारण व्यवसाय प्रभावित भएको धारणा उनले राखे । मदिरा व्यवसायीहरूले सरकारलाई कर तिरेर व्यवसाय गर्दै आएपनि नीति कठोर बन्दा उनीहरू निरुत्साहित भएको बताएका छन् । व्यवसायी सरकारले उचित नीति ल्याई स्वदेशी उत्पादनलाई प्रवद्र्धन गर्नुपर्ने माग राखेका छन् । नेपाल मदिरा व्यवसायी महासंघ केन्द्रीय सल्लाहकार गिरीराज पौडेल, नेपाल मदिरा व्यवसायी महासंघ लुम्बिनी प्रदेश अध्यक्ष शम्भु भट्टराई, उद्योग वाणिज्य संघ चन्द्रौटाका अध्यक्ष ईश्वरी पाण्डे, शिवराज नगरपालिका वडा नम्बर १ का वडाअध्यक्ष खिमविक्रम केसी, हिमालय भुसाल, बाबुराम पाण्डे, लक्ष्मण रेग्मी, लेखनाथ घर्ती, संदेश कक्षपती, शलिकराम पाण्डे सतिश महर्जन, संघका अध्यक्ष कुलचन्द्र सिग्देल, गोविन्द पौडेल र खगेन्द्र पौडेल लगायतले सम्बोधन गरेका थिए ।