खोज

बुटवल, ६ चैत । बुटवलमा जारी प्रथम वडा स्तरीय मेयर कप नकआउट फुटबल प्रतियोगिताको उपाधिका लागि वडा नं १५ र ११ भिड्ने भएको छ । बुटवल उपमहानगरपालिकाको संरक्षकत्व तथा आदर्श युवा क्लबको आयोजनामा रतनपुरको मुक्तिधाम खेलमैदानमा बुधबार भएको पहिलो सेमीफाईनलमा वडा नं १५ ले वडा नं १४ लाई १–० तथा दोस्रो सेमीफाईनल खेलमा वडा नं. ११ ले वडा नं. ८ लाई २–० गोल अन्तरले पराजित गर्दै फाईनल भिडन्त पक्का गरेको हो ।

पहिलो खेलमा वडा नं १५ को जितमा दिपेश थापा मगर नायक रहे । उनले एकमात्र विजयी गोल गरे । प्रतियोगितामा वडा नं १५ का गोलकिपर डेभिड थापामगर म्यान अफ दि म्याचबाट पुरस्कृत भए । यसैगरि दोस्रो खेलमा दुई गोल गर्ने वडा नं. ११ का नवीन थापा म्यान अफ दी म्याचबाट पुरस्कृत भए । फाईनल खेल विहिबार दिउसो हुने क्लबका अध्यक्ष मनिष काफलेले बताए ।

प्रतियोगिताको उपाधि विजेताले नगद १ लाख १ हजार १ सय ११ रुपैया, कप, मेडल, प्रमाणपत्रबाट पुरस्कृत गरिने खेल संयोजक राजेन्द्र बुढाथोकीले बताए । यसैगरि उपविजेता टिमलाई नगद ५१ हजार १ सय ११ रुपैया कप, मेडल, प्रमाणपत्र तथा विधागत रुपमा उत्कृष्ट खेलाडीहरुलाई समेत पुरस्कृत गरिने उनले बताए । चैत ६ गतेसम्म संचालन हुने प्रतियोगितामा करीब ६ लाख खर्च हुने आयोजकको अनुमान छ ।