खोज

बुटवल, ६ चैत ।

रुपन्देहीको तिलोत्तमा–४, ड्राइभरटोल निबासी लक्ष्मी ज्ञवाली दैनिक योग गर्न करिव दुई किलोमिटर टाढा मणिग्राम पुग्थिन् । समयको व्यवस्थापनको चापले उनले स्कुटी लिएर योग शिविरमा पुग्थिन भने योग सकेर घर फर्किदा करिव ७ बज्थ्यो ।

तर अहिले भने उनको घर नजिकै योग शिविर सञ्चालन हुँदा उनको समयको बचत भएको छ । आजभोली उनी पैदल हिंडेरै योग शिविरमा पुग्न सक्छिन् ।

उनीजस्तै ड्राइभरटोलकै जीवलाल अर्याल र जयसरा अधिकारी पनि मणिग्राम पुगेर योग शिविरमा सहभागिता जनाउँथे । तर आफ्नै वडामा शिविर सुरु भएपछि मणिग्राम जानुपर्ने झन्झट हटेकोमा उनीहरु दङ्ग छन् ।

 केही दिनयता तिलोत्तमा–४ स्थित विष्णुपुर योग साधना केन्द्रमा योग शिविर सञ्चालन भैरहेको छ । जसको आयोजना तिलोत्तमा नगरपालिका ४ नम्बर वडा कार्यालयले गरेको हो भने संयोजन विश्व शान्ति तथा आध्यात्म विज्ञान समाजले गरेको हो । जहाँ समाजका केन्द्रीय सदस्य समेत रहेका योग प्रशिक्षक अर्जुन ज्ञवालीले दैनिक ५ देखि साढे ६ बजेसम्म योग सिकाउँछन् । जस अन्तर्गत सहभागीलाई मन्त्रहरु, सुक्ष्म साधना, आसन, प्रणायाम, ध्यान, आहारबिहार, रोग अनुसारको योग जस्ता कुराहरुको अभ्यास गराइन्छ ।

अव नियमित योग कक्षा सञ्चालन हुने जानकारी दिंदै ज्ञवालीले भने–“योगलाई सबैले दैनिकीको हिस्सा बनाउनु जरुरी छ ।” स्वास्थ्यका लागि योग र प्रणायाम जरुरी रहेको भन्दै उनले यसले मात्रै मानिसको जीवनमा शान्ति, अनुशासन र सदभावको भावना समेत जागृत गर्ने बताए ।

नियमित योग कक्षामा सहभागी हुँदै आएका तिलोत्तमा ४ नम्बर वडा कार्यालयका सचिव काशीराम ज्ञवालीले योगको महत्व बुझेर नै आफू पनि यसमा नियमित सहभागी हुँदै आएको बताए । “यसको व्यवस्थापन वडा कार्यालयले गरेको छ, थप दुई स्थापनमा पनि योग कक्षा सञ्चालन गर्ने तयारी छ”–उनले भने । वडा कार्यालयले गतवर्ष पनि बालबालिकाको लागि ७ दिने योगा, ध्यान, प्रणायाम सम्बन्धी असल अभ्यास गराएको थियो ।

आगामी दिनमा योग शिविरलाई थप व्यवस्थित ढंगले अगाडि बढाउँदै लगिने वडाध्यक्ष हरिबहादुर क्षेत्रीले बताए । “अव योग शिविर निरन्तर चल्छ, हामीले बिस्तारै सबै कुराहरुको व्यवस्थापन गर्दै जाने छौं”–उनले भने ।

विश्व शान्ति तथा आध्यात्म समाजले देश तथा विेशमा समेत शाखा खोलेर योग शिविर चलाउँदै आएको छ । समाजका संस्थापक योगी आचार्य राजन शर्माको प्रेरणाबाट योगलाई देशभरका साथै विदेशमा समेत सञ्चालन गर्ने गरिएको योग प्रशिक्षक ज्ञवाली बताउँछन् ।

विश्व शान्ति तथा अध्यात्म विज्ञान समाजले तिलोत्तमाका चार स्थानमा दैनिक योग साधना केन्द्रहरू सञ्चालनमा ल्याएको छ । तिलोत्तमा नगरपालिका वडा नम्बर ५ मणिग्रामस्थित सरस्वती पन्चायतन मन्दिरमा २०८० साल असार ६ गतेबाट निरन्तर योग प्रशिक्षण चलिरहेको छ ।

त्यस्तै तिलोत्तमा–६ बाह्र नम्वरस्थित गीता मन्दिरमा गत असार ७ गतेबाट निरन्तर योग शिविर चलिरहेको छ भने तिलोत्तमा–५ नयाँ मिलस्थित न्यौपाने वंश समाजमा गत असार १५ गते बाट निरन्तर योग शिविर चलिरहेको छ ।