खोज

बुटवल ।

लायन्स क्लब अफ बुटवल सयपत्रीले सोमबार बुटवल उपमहानगरपालिका वडा नं। १५, उजेलापुरस्थित लुम्बिनी अपाङ्ग, दृष्टिविहिन तथा अनाथ आश्रममा आश्रितहरूका लागि सहयोग गरेको छ। गर्मीमा चिसो पानी पिउन र खाना भण्डारण गर्न सहज होस् भन्ने उद्देश्यले क्लबले आश्रमलाई फ्रिज, दुईवटा ग्यास सिलिन्डर, खाजा तथा तरकारी वितरण गरेको हो।

लायन्स क्लबको हामी सेवा गर्छौ भन्ने अन्तर्राष्ट्रिय नारालाई आत्मसात गर्दै क्लबले आफ्नो वार्षिक कार्यक्रमअनुसार उक्त सहयोग हस्तान्तरण गरेको हो। क्लबकी अध्यक्ष कमला बस्नेत कुँवरको अध्यक्षता, डिष्ट्रिक्ट गभर्नर पुरुषोत्तम भक्त प्रधानांगको प्रमुख आतिथ्यतामा सम्पन्न कार्यक्रममा फर्स्ट डिष्ट्रिक्ट गभर्नर बालाराम भट्टराई र सेकेन्ड भिजी सन्दीपको संसोधनमा  विशिष्ट आतिथ्य रहेको थियो।

कार्यक्रममा प्रमुख अतिथि प्रधानांगले यस कार्यक्रमलाई अन्तर्राष्ट्रिय ग्लोबल कज हंगर रिलिफु अन्तर्गतको एक महत्वपूर्ण प्रयास रहेको भन्दै यस्ता गतिविधिले लायन्स क्लबको मूल मर्म र उद्देश्य प्राप्तिमा योगदान पुग्ने बताए। साथै, लायन्स क्लब अफ बुटवल सयपत्रीले विभिन्न समयमा रचनात्मक कार्यक्रमहरू गर्दै आएको उल्लेख गर्दै यसलाई निरन्तरता दिन आग्रह गरे।

कार्यक्रममा फर्स्ट डिष्ट्रिक्ट गभर्नर बालाराम भट्टराई, सेकेन्ड भिजी सन्दीप कसोधन, डिष्ट्रिक्ट ट्रेजरर प्रकाश श्रेष्ठ, एओजी तथा क्लबका पूर्व अध्यक्ष कल्पना शिवाकोटी, रिजन चेयरपर्सन विष्णु उपाध्यायलगायतले दृष्टिविहिन, फरक क्षमता भएका तथा अभिभावक गुमाएकाहरूलाई सबैले सहयोग गर्नुपर्ने धारणा व्यक्त गरेका थिए।

आश्रमका सञ्चालक लिलाराम मगरले लायन्स क्लबद्वारा गरिएको यस्ता कार्यक्रमहरूले आश्रमलाई ठूलो सहयोग पुग्ने बताउँदै क्लबप्रति आभार व्यक्त गरे। कार्यक्रम संयोजक तथा क्लब सचिव शान्तिलक्ष्मी अर्यालको सञ्चालनमा कार्यक्रम सम्पन्न भएको थियो।