खोज

सल्यान, ०४ चैत ।
छत्रेश्वरी गाउँपालिकाको दिर्घकालीन महत्वको शंखमुल–दारिमज्यूला–जयचौर सडक कालोपत्रे गर्ने कार्य सुरु भएको छ । गाउँपालिकाका अध्यक्ष ओज बहादुर बुढाथोकीले आइतबार औपचारिक रूपमा सिलान्यास गर्दै सडक निर्माण कार्यको शुभारम्भ गरेका हुन् । २ करोड ८९ लाख ८० हजार ५२९ रूपैयाँको लागतमा सडक कालोपत्रे गर्न लागिएको हो ।
सडक निर्माणका लागि आवश्यक बजेट गाउँपालिकाको ५० प्रतिशत तथा समपुरक अनुदानको ५० प्रतिशत गरी प्राप्त भएको छ । चालु आर्थिक वर्षमा करिब २२०० मिटर सडक कालोपत्रे गरिनुका साथै केही स्थानमा नाला निर्माणको काम समेत सम्पन्न गरिने योजना रहेको छ ।

पूर्वाधार विकासलाई प्राथमिकतामा राख्दै विकास निर्माणका कामहरूलाई निरन्तरता दिइरहेको भन्दै गाउँपालिका अध्यक्ष बुढाथोकीले स्तरिय सडक निर्माण पश्चात स्थानीय बासिन्दाहरूको आर्थिक तथा सामाजिक जीवनस्तर उकास्न टेवा पुग्ने विश्वास व्यक्त गरे । समग्र पालिकाको विकासका लागि गाउँपालिकाले सक्रियताका साथ लागेर विभिन्न निकाय र क्षेत्रसंगको समन्वयलाई जोड दिइएको उनको भनाइ छ ।

सडक निर्माणको जिम्मा ठेक्का प्रक्रियामार्फत अप्लाइड इन्जिनियरिंग प्रा. लि. कार्यविनायक, ललितपुरले पाएको छ । उक्त कम्पनीले गाउँपालिकासँग १ करोड ८० लाख ८४ हजार २४६ रूपैयाँको लागतमा सम्झौता गरिसकेको छ । सम्झौता बमोजिम तोकिएको समयमा गुणस्तरीय काम सम्पन्न गर्ने निर्माण व्यवसायी पवित्रमान बोहराको प्रतिबद्धता छ ।
सिलान्यास कार्यक्रममा गाउँपालिकाका प्रमुख प्रशासकीय अधिकृत गुरु प्रसाद योगी, भूमि समस्या समाधान आयोग सल्यानका सदस्य ज्ञान बहादुर खड्का लगायतको उपस्थिती रहेको थियो । गत आर्थिक वर्षमा पनि यस सडक खण्डमा विभिन्न पूर्वाधार निर्माण भएका थिए । नाला निर्माण, आवश्यक स्थानमा रिटेनिङ वाल निर्माण, ह्युम पाइप तथा ग्याविन जाली जडान, मोड सुधार लगायतका कार्य सम्पन्न भएका थिए । यस पटक सडक कालोपत्रे भएमा यातायात सुगम बनाउनुका साथै स्थानीय बासिन्दाहरूलाई थप सुविधा पुग्ने अपेक्षा गरिएको छ ।