खोज

बंगलादेशकी पूर्वप्रधानमन्त्री शेख हसिनाका निकट सहयोगी डा. रब्बी आलमले शेख हसिना छिट्टै बंगलादेशको प्रधानमन्त्रीको रूपमा फर्किने दाबी गरेका छन्।

एएनआईसँगको अन्तर्वार्तामा उनले भने, “शेख हसिना बंगलादेशको प्रधानमन्त्रीको रूपमा फर्कनेछिन्। युवा पुस्ताले गल्ती गरेको छ, तर यो उनीहरूको गल्ती होइन, उनीहरूलाई भ्रममा पारिएको छ।” उनले बंगलादेशको वर्तमान स्थितिलाई ‘आक्रमणमा रहेको’ भन्दै अन्तर्राष्ट्रिय समुदायलाई हस्तक्षेप गर्न आग्रह गरे।

डा. आलमले बंगलादेशको राजनीतिक स्थिति आक्रमणको जस्तो रहेको र यसलाई आतंकवादी विद्रोहको रूपमा ब्याख्या गरे। उनले भने, “राजनीतिक विद्रोह ठीक छ, तर बंगलादेशमा त्यस्तो भइरहेको छैन। यो एक आतंकवादी विद्रोह हो।”

यससँगै उनले बंगलादेशका अन्तरिम सरकारका प्रमुख सल्लाहकार मोहम्मद युनुसलाई राजीनामा दिन र ‘जहाँबाट आएको हो, उतै फर्कन’ आग्रह गरे। उनले थपे, “हामी बंगलादेशका सल्लाहकारलाई राजीनामा दिन र तपाईं जहाँबाट आउनु भएको थियो त्यहीँ फर्कन भन्न चाहन्छौँ। डा. युनुस, तपाईं बंगलादेशको होइन।”

यसको बीचमा, बंगलादेशको ढाकास्थित अदालतले शेख हसिना र उनका नातागोताका सम्पत्ति जफत गर्न आदेश दिएको छ। यसअघि बंगलादेशका विद्यार्थीहरूको विशाल आन्दोलनका कारण हसिना १५ वर्षदेखिको सत्ता छोडेर देश छोड्न बाध्य भएकी थिइन्। तीन दिनपछि, मोहम्मद युनुसको नेतृत्वमा अन्तरिम सरकार गठन गरिएको थियो।