खोज

सल्यान,२९ फागुन ।
सल्यानका विभिन्न बजार अनुगमनको क्रममा ४६ हजार रूपैयाँ बढिको अबैध सामान बरामद भएको छ । जिल्ला प्रशासन कार्यालय सल्यानका प्रमुख हरिशचन्द्र शर्माको संयोजकत्वमा गरिएको बजार अनुगमनमा टोलीले त्रिवेणी, छत्रेश्वरी, सिद्धकुमाख गाउँपालिका र शारदा नगरपालिकाका बजार क्षेत्रमा अनुगमन गर्दै अवैध रूपमा बिक्री वितरण भइरहेका सामान नियन्त्रणमा लिएको हो ।
बुधबार अनुगमन गर्ने क्रममा अनुमति बिना बिक्री वितरण भइरहेका पेट्रोलियम पदार्थ, घरेलु मदिरा, बियर, कोक, फ्यान्टा, फ्रुटी, जुस लगायतका हल्का पेय पदार्थ, मसला, दालमोठ, बिस्कुट, भुजा लगायतका खाद्य वस्तुहरू बरामद गरिएको थियो । बरामद गरिएका वस्तुहरूको बजार मूल्य करिब ४६ हजार ५५ रूपैयाँ रहेको छ । उद्योग तथा उपभोक्ता हित संरक्षण कार्यालय सल्यानको वार्षिक कार्यक्रम अनुसार सम्पन्न अनुगमनमा कार्यालय प्रमुख श्यामलाल खराल, त्रिवेणी गाउँपालिकाका शाखा अधिकृत तिलक रावल, सिद्धकुमाख गाउँपालिकाका स.म.बि.नि. चन्द्रा देवकोटा, उद्योग कार्यालयका ध्रुव बहादुर खत्री, प्रज्वल अधिकारी तथा स्थानीय प्रहरी प्रशासनका प्रमुख प्रतिनिधिहरू सहभागी थिए ।
अनुगमन टोलीले उपभोक्ताको स्वास्थ्यमा असर पु¥याउन सक्ने तथा कानून विपरीत व्यापार गरिरहेका व्यवसायीहरूलाई सचेत गराउँदै कानुनी प्रक्रिया पूरा गरेर व्यवसाय सञ्चालन गर्न निर्देशन दिएको छ । उद्योग तथा उपभोक्ता हित संरक्षण कार्यालयले यस्ता अनुगमनलाई निरन्तरता दिने जनाएको छ ।