खोज

रुपन्देही —

नेपाल कम्युनिस्ट पार्टी (माओवादी केन्द्र) का अध्यक्ष तथा पूर्वप्रधानमन्त्री पुष्पकमल दाहाल ‘प्रचण्ड’ले रुपन्देही जिल्लाको ओमसतियामा अवस्थित ऐतिहासिक तथा धार्मिक रामजानकी जमुहानी पोखरा ताल पार्कको शिलान्यास गरेका छन्।

शिलान्यास कार्यक्रममा अध्यक्ष प्रचण्डलाई ओमसतियाका स्थानीय बासिन्दाले भव्य स्वागत गरेका थिए। उनीहरूद्वारा प्रचण्डको सुस्वास्थ्य, दीर्घायु र क्रियाशीलताको कामना गर्दै उनको उमेर बराबर ७१ केजीको मालाले सम्मान गरिएको थियो।

कार्यक्रमलाई सम्बोधन गर्दै प्रचण्डले जमुहानी पोखरा ताललाई पर्यटकीय गन्तव्यका रूपमा विकास गर्न आवश्यक समन्वय र सहकार्य गर्ने प्रतिबद्धता व्यक्त गरे।

उनले तराई-मधेश जागरण अभियान हाल स्थगित गरिएको भए पनि ओमसतियामा जनताको माया र सम्मान देख्दा अभियाननै जीवन्त भएको अनुभूति भएको बताए। साथै, अभियानअन्तर्गत विभिन्न ऐतिहासिक तथा धार्मिक क्षेत्रहरूको अवलोकन र संरक्षणमा विशेष पहल गरिने उनले उल्लेख गरे।

कार्यक्रमको समापनमा सोही वडाका वडाध्यक्ष शिवकुमार धवलले तत्कालीन अर्थमन्त्री वर्षमान पुनको कार्यकालमा उक्त परियोजनाका लागि १ करोड २७ लाख रुपैयाँ बजेट विनियोजन गरिदिएकोमा धन्यवाद ज्ञापन गरे।

उनले यस योजनाले स्थानीय रोजगारी सिर्जना गर्ने, पर्यटन प्रवर्द्धन गर्ने र वातावरणीय सौन्दर्य कायम राख्ने उल्लेख गर्दै ताल संरक्षण तथा पर्यटन विकासका लागि सबै तहका सरकारहरूको समान भूमिका आवश्यक रहने बताए।