खोज

गुल्मी, २३ फागुन ।
गुल्मीको भाडागाउँमा राष्ट्रिय प्रसारण लाइनको विद्युतीय सेवा सुचारु भएको छ । उनायचौर सब–स्टेशनबाट भाडागाउँमा राष्ट्रिय प्रसारण लाइनको विद्युतीय सेवा सुचारु भएको हो । जिल्लाको सदरमुकाम तम्घास नजिकै रहेर पनि रेसुङ्गा नगरपालिका वडा –३ भाडागाउँमा हालसम्म राष्ट्रिय प्रसारण लाइनको विद्युतीय सेवा पुगेको थिएन ।
उनायचौर सब स्टेशनबाट एक कार्यक्रमका बीच रेसुङ्गा नगरपालिका प्रमुख खिलध्वज पन्थीले भाडागाउँ पुग्ने ११ केभी फिडरको उद्घघाटन गरेसँगै भाडागाउँमा अब राष्ट्रिय प्रसारण लाइनको विद्युत सेवा पुगेको नेपाल विद्युत् प्राधिकरण गुल्मी वितरण केन्द्रका निमित्त प्रमुख इन्जिनियर भरत पोखरेलले जानकारी दिएका छन । भाडागाउँका नागरिकले धेरै पहिलेदेखि गुनासो गरिरहेको र रेसुङ्गा नगर प्रमुखको पहलमा उनाय चौर सब–स्टेसनबाट नयाँ निस्किएको ११ केभी फिडरबाट विद्युतीय सेवा नयाँ रुट बनाएर उपलब्ध गराएको इन्जिनियर पोखरेलले बताए ।रेसुङ्गा नगरपालिका –३ का वडाध्यक्ष बाबुराम खत्रीले भाडागाउँमा आजसम्म विद्युतीय सेवामा निकै सास्ती खेप्नुपरेको औल्याए । उनले यस अघि सामुदायिक विद्युत मार्फत मुसिकोट र इस्मा हुँदै रेसुङ्गाको भाडागाउँमा आउने लाईनबाट त्यस क्षेत्रका नागरिकहरूले पटक पटक समस्या भोग्नु परेको बताए । अब उक्त समस्याको समाधान भएको भन्दै खत्रीले वडाका सबै नागरिकको तर्फबाट खुसी व्यक्त गरेका छन ।

कार्यक्रममा रेसुङ्गा नगरपालिका प्रमुख खिलध्वज पन्थीले भाडागाउँ र बेहोरेबासीले महिनामा १५ दिन मात्रै राम्रोसँग सेवा पाउने बाँकी दिन समस्या खेप्नुपरेको समस्यालाई बुझेर उक्त समस्याको समाधानका लागि राष्ट्रिय प्रसारण लाइनको विद्युतीय सेवासँग भाडागाउँलाई जोडिएको बताए । “विद्युतीय सेवा पूर्वाधार विकासमा महत्वपूर्ण छ”, नगरप्रमुख पन्थीले भने “विद्युत सेवालाई बाहिर राखेर समुन्नतिका आधार तय गर्न सकिँदैन । नगरपालिका प्रमुख पन्थीले अहिले विद्युतको क्षेत्रमा गुल्मीले निकै फड्को मारेको बताए ।गुल्मीको उनायचौरमा १३२ केभीको राष्ट्रिय प्रसारण लाइनको उनायचौर सब–स्टेसन निर्माण गरिएको छ । अब यसको सेवा गुल्मी, पाल्पा, अर्घाखाँची बाग्लुङसम्म पुग्ने बताइएको छ । सामुदायिक विद्युतीकरणमा निकै सास्ती खेपिरहेका त्यस क्षेत्रका नागरिकहरूलाई अब सधैंका लागि समस्या समाधान भएको स्थानीय चेतमान कुँवरले बताएका छन् ।गुल्मीको उनायचौरमा बनेको १३२ केभीको राष्ट्रिय प्रसारण लाइनको उनायचौर सब–स्टेसन बाट विद्युतीय सेवा सुचारु भएपछि समग्र गुल्मीमा प्राविधिक प्रक्रिया बाहेक कुनै पनिे विद्युतीय समस्या नहुने भएको छ ।