खोज

लमही, २३ फागुन ।
लामो समयदेखि प्रयोगविहीन भै गौचन बनेको लमहीको अन्तर्राष्ट्रिय मापदण्डको क्रिकेट मैदान फेरि सक्रिय बन्दै गएको छ । यू–१९ महिला विश्व एसिया क्वालिफायरको तयारीका लागि भदौ ३० गतेदेखि बन्द प्रशिक्षण भएको थियो । नेपाल क्रिकेट संघ (क्यान) को निर्णयअनुसार, देशभरिबाट करिब ३५ देखि ४० जना महिला खेलाडी प्रशिक्षणमा सहभागी हुनेछन् । यसअघि गत माघमा पनि यहाँ बन्द प्रशिक्षण सम्पन्न भइसकेको थियो । त्यस्तै, आगामी फागुन २५ गते प्रधानमन्त्री कप एकदिवसीय पुरुष राष्ट्रिय क्रिकेट प्रतियोगिता समेत यही मैदानमा आयोजना हुने तय भएको छ । लमहीमा प्रधानमन्त्री कप प्रतियोगिता हुने भएपछि मैदान तयारीको काम तीव्र रूपमा भइरहेको छ । दैनिक १० जना व्यक्तिहरू मैदानको मर्मतमा संलग्न छन् । कोही पानी छर्किरहेका छन् भने कोही पिचलाई सम्याइरहेका छन् । प्रधानमन्त्री कप एकदिवसीय पुरुष राष्ट्रिय क्रिकेट प्रतियोगिता फागुन २५ गतेदेखि सुरु हुँदैछ । नेपाल क्रिकेट संघ (क्यान) ले यो प्रतियोगिता दाङको लमहीस्थित देउखुरी अन्तर्राष्ट्रिय क्रिकेट मैदान, सिद्धार्थ रंगशाला र तिलोत्तमा एक्स्ट्राटेक ओभल मैदानमा सञ्चालन गर्न लागेको हो ।प्रतियोगितामा सात प्रदेश र तीन विभागीय टोलीको सहभागिता रहनेछ । राष्ट्रिय खेलकुद परिषद्को आर्थिक सहयोगमा क्यानले प्रतियोगिता आयोजना गर्दैछ । यसअघि प्रधानमन्त्री कप महिला राष्ट्रिय क्रिकेट प्रतियोगिता लमहीमै सम्पन्न भइसकेको छ ।

प्रतिष्ठित मानिएको यो प्रतियोगिताका लागि देउखुरी अन्तर्राष्ट्रिय क्रिकेट मैदानमा तयारी तीव्र पारिएको छ । मैदान सम्याउने, पिच निर्माण, दर्शकदीर्घा व्यवस्थापन, सुरक्षा संरचना मजबुत बनाउने तथा अन्य भौतिक पूर्वाधार मर्मत कार्य तीव्र गतिमा भइरहेको नेपाल क्रिकेट संघका केन्द्रीय सदस्य तथा जिल्ला अध्यक्ष प्रदीप मजगैयाँले जानकारी दिए । ‘खेललाई भव्य बनाउने गरी तयारी भइरहेको छ । अहिले मैदानको मर्मतको काम अन्तिम चरणमा पुगेको छ,’ मजगैयाँले भने, ‘यहाँ हुने खेलले जिल्ला मात्र नभई समग्र देशलाई नयाँ सन्देश दिनेछ ।’लमहीमा क्रिकेट गतिविधि बढेसँगै स्थानीय समुदाय, व्यवसायी, र खेलप्रेमीहरूमा नयाँ आशा जागेको छ। मैदानको पुनः प्रयोगले क्रिकेट पर्यटन लाई प्रवद्र्धन गर्ने तथा स्थानीय अर्थतन्त्रलाई टेवा पु¥याउने अपेक्षा गरिएको छ ।करोडौंको लागतमा निर्माण भएको ५०० दर्शक क्षमताको भीआईपी स्ट्यान्ड, अत्याधुनिक आउटफिल्ड, बाउन्ड्री, क्रिजहरू, साइट स्क्रिन, डगआउट/पविलियन जस्ता संरचना तयार भए पनि हालसम्म नियमित रूपमा प्रयोग हुन सकेको थिएन। स्वामित्वको अन्योलकै कारण मैदान निष्क्रिय बनेको थियो । तर, हालैको निर्णयपछि नियमित खेल तथा प्रशिक्षणको वातावरण बनाउन खेलाडी तथा खेलसँग सम्बद्ध निकायहरूले पहल थालेका छन्। क्रिकेट संघका पदाधिकारीहरूले मैदानलाई खेलाडीमैत्री बनाउँदै निरन्तर प्रतिस्पर्धा आयोजना गर्ने प्रतिबद्धता व्यक्त गरेका छन् ।

लामो समयसम्म सुनसान रहेको यो मैदान अब फेरि खेलाडीको प्रशिक्षण स्थल बन्ने मात्र नभई, नेपाली क्रिकेटमा नयाँ प्रतिभा उदाउने थलोका रूपमा स्थापित हुने विश्वास गरिएको छ। लमही नगर बिकास समितिको १० करोड, खेलकुद बिकास समिति र लमही नगरपालिका २ करोड गरि १२ करोडको लगतमा निर्माण भएको मैदान सुरुमा ६० मिटर रेडियसमारहेको मैदान विस्तार अन्तर्राष्ट्रिय मापदण्डअनुसार ८० मिटरमा पुर्याइएको हो । भने २० देखि २५ हजार दर्शक अट्ने समचना निर्माण भएको नगर बिकास समितिका अबओभरसेय तुल्शी अर्यालले बताए ।