खोज

रूपन्देहीको सैनामैना नगरपालिका मुुर्गियामा प्रथम सैनामैना गोल्डकप फुटवल प्रतियोगिता सुरु भएको छ । मोफसलमा त्यो पनि राज्यको ध्यान नपुगेको क्षेत्रमा राष्ट्रिय स्तरको फुटबल प्रतियोगिता आयोजना हुनु आफैमा गौरवको कुरा हो । युवाहरूले चाहे देश निर्माणमा विभिन्न तहबाट योगदान गर्न सक्छन भन्ने यो राम्रो उदाहरण हो । आयोजक मुर्गिया फुटवल क्लव युवाहरूको एउटा यस्तो राम्रो जमात हो जसले मोफसलमा यति ठूलो राष्ट्रियस्तरको प्रतियोगिता आयोजना गर्न सफलता हासिलमात्रै गरेको छैन, स्थानीय स्तरमै खेलाडी उत्पादन गर्ने आधार सिर्जना गरेको छ । सैनामैना गोल्डकप सैनामैनाको इतिहास, गरिमा र पहिचानसँग जोडिएको छ । सैनामैना गोल्डकप सैनामैनाको गौरव हो । अव यो प्रतियोगितालाई निरन्तरताको खाँचो छ । आयोजक मुर्गिया फुटवल क्लवका पदाधिकारी यो प्रतियोगिता आयोजना गरेर जति खुसी र उत्साहित छन, आगामी बर्षहरूमा पनि यो खेललाई निरन्तरता दिने संकल्प र प्रतिवद्धताको खाँचो छ । बुटवलको ५० बर्ष लामो इतिहास बोकेको तिलोत्तमा गोल्डकपले निरन्तरता पाउन नसकिरहेको अवस्थामा छिमेकी पालिकामा राष्ट्रियस्तरको प्रतियोगिता आयोजना हुनु वास्तवमै आयोजकको लागि गौरवको कुरा हो ।

अब यसको साख जोगाउनेतर्फ आयोजकले गौरवबोध गनैपर्दछ । सैनामैनाको पहिचान र इतिहास बचाईराख्न अव यो प्रतियोगिताको नियमितता महत्वपूर्ण कुरा हुनेछ । यस बिषयमा सैनामैना गोल्डकप फुटवल प्रतियोगिता आयोजना गर्ने मुर्गिया फुटवल क्लवको ध्यान जानु जरुरी छ । सैनामैना नगरपालिकाको संरक्षकत्वमा रहेको यो प्रतियोगिता अव सैनामैनाकै ब्राण्ड बन्नुपर्दछ । पछिल्लोसमय सैनामैना खेलमय बनिरहेको छ । करिव एक महिना अगाडी सैनामैनाकै कलौनीमा राष्ट्रियस्तरको भलिबल प्रतियोगिता सौहार्दपूर्णरूपमा सम्पन्न भएको छ । त्यसको एक महिना नबित्दै अर्को राष्ट्रिय खेल मुर्गियामा आयोजना हुनु चुनौतिकै कुरा थियो तर आयोजकले जुन हिम्मत र साहस जुटाएर यो प्रतियोगिता सम्पन्न गर्ने चुनौति जुटाएका छन, त्यसले सैनामैनाको अपार संभावना उजागर गरेको छ । यो भनिरहँदा सैनामैनाले गौरवबोध गर्नैपर्दछ । प्रतियोगिताले सैनामैनाको बढाउन महत्वपूर्ण सहयोग पु¥याएको छ । सैनामैना फुटवल क्लवले राष्ट्रिय फुटवल प्रतियोगिता आयोजना गरेको मात्रै छैन, खेलको माध्यमबाट यहाँको आर्थिक संभावनाको ढोका खोल्ने प्रयास गरेको छ । खेलकै माध्यमबाट सैनामैनाको सामिप्यता, भातृत्व र एकतालाई अझै घनिभूत वनाएको छ ।
यति महत्वपूर्ण प्रतियोगिता जसले सैनामैनाको गरिमा बोकेको छ, यसलाई निरन्तरता दिने कुरामा अब आयोजकको ध्यान जानैपर्दछ । यो प्रतियोगिताको संरक्षक सैनामैना नगरपालिकाले पनि यसको निरन्तरताको बिषयमा चासो दिनु जरुरी छ । गोल्डकप अखिल नेपाल फुटबल संघ (एन्फा) को क्यालेन्डरमा समावेश गरी यसलाई सैनामैनाको बार्षिक क्यालेण्डरमा समावेश गर्नेतर्फ सैनामैनाका जनप्रतिनिधिको ध्यान जाओस् ।

अब संरक्षक तथा अभिभावकको रूपमा सैनामैना नगरपालिकाले यसको सञ्चालन तथा निरन्तरतामा पहलकदमी लिनुपर्दछ । प्रतियोगिता सञ्चालन गर्न निश्चितरूपमा ठूलो धनराशी खर्च हुन्छ तर नगरपालिका, यहाँका राजनैतिक दल, संघ संस्थाले चासो र तदारुकता लिएमा असम्भव भन्ने छैन । त्यसका लागि दृढ इच्छाशक्ति आवश्यक पर्दछ । प्रतियोगिता आयोजनामा यो बर्ष ६० देखि ६५ लाख खर्च हुँदैछ । प्रतियोगिताको लागि स्थायी श्रोत नभएको अवस्थामा आयोजकका लागि यतिधेरै रकम जुटाउनु चुनौतिकै कुरा हो तर प्रतियोगिता गर्ने दृढता हुने हो भने सम्भव छ भन्ने कुरा यो प्रतियोगिता साक्षी बनेको छ । सैनामैनालाई खेल क्षेत्रको हबको रूपमा विकास गर्ने यो एउटा महत्वपूर्ण अभियानको नेतृत्व जसरी मुर्गिया फुटवल क्लवले गरेको छ, आगामी दिनमा यसलाई निरन्तरता दिनेतर्फ क्लवको ध्यान जानु जरुरी छ । क्लवले प्रतियोगिता आयोजनासंगै स्थानीयस्तरमा खेलाडी उत्पादन गर्ने जुन सपना बोकेको छ, त्यो लक्ष्य पूरा हुने कुरामा आशंका गरिरहनु पर्दैन् । तसर्थ अवको दिनमा जसरी फुटवलको महाकुम्भ गरेर सैनामैनालाई खेलमय वनाउन आयोजकलाई सफलता प्राप्त भएको छ, सैनामैनाको ब्राण्डको रूपमा यो प्रतियोगिताको पहिचान श्रीबृद्धिमा पनि सफलता मिलोस् ।