खोज

काठमाडौँ ।

प्रधानमन्त्री केपी शर्मा ओलीले कुनै पनि बहानामा श्रमिकलाई न्यूनतम पारिश्रमिकभन्दा कम पारिश्रमिक दिइ काम लगाएको पाइएमा त्यसलाई दण्डनीय अपराध ठहर्याइने बताएका छन्।

नेपाल ट्रेड युनियन महासङ्घ (जिफन्ट) द्वारा आयोजित नेपाली ट्रेड युनियन आन्दोलनको ७८औं वार्षिकोत्सव समारोहलाई सम्बोधन गर्दै प्रधानमन्त्री ओलीले नर्सहरूको पनि न्यूनतम तलव पाइरहेका छैनन् भन्ने कुरा सुनेको उल्लेख गर्दै भने, “कुनै पनि बहानामा न्यूनतमभन्दा कम पारिश्रमिक दिएर श्रमिकलाई काम लगाउन पाइँदैन।”

उहाँले श्रमिकको मन प्रसन्न नभइ उद्योग–व्यवसायका काम सहज रूपमा अघि बढ्न नसक्ने बताएका छन्। श्रमिकहरूलाई रोजगारदातामा रूपान्तरण हुन सक्ने भएकाले, श्रमिकका लागि उपयुक्त वातावरण सृजना गर्नुपर्नेमा जोड दिए।

प्रधानमन्त्री ओलीले थप भने, “व्यवस्था परिवर्तनको आन्दोलनका क्रममा हाम्रा साथीहरू मारिएका थिए, तर हाम्रा उद्देश्यहरू मारिएका थिएनन्। हामी जेल गएका थियौँ, तर हाम्रा उद्देश्यहरू जेल गएका थिएनन्। अब हामी परिवर्तनको मर्म अनुसार अघि बढ्नुपर्छ। हामीले अन्तर्राष्ट्रिय मान्यताअनुसार सरकार, रोजगारदाता र श्रमिकलाई विन-विन स्थितिमा ल्याउन सक्नुपर्छ। सरकारले तटस्थ बसेर निष्पक्ष निष्कर्ष निकाल्नुपर्छ।”

उनले नेपाली समाजको जात, धर्म र संस्कृतिका नाममा विभाजन गर्ने तथा काम गर्न खोज्नेविरुद्ध भ्रम र अवरोध सृजना गर्ने प्रवृत्तिलाई चिर्नुपर्ने आग्रह गरे र व्यवस्था परिवर्तनपछि देशको विकासको क्रम बढेको स्पष्ट गरे।

प्रधानमन्त्री ओलीले भने, “हामीलाई कसैको अनावश्यक विरोधसँग मतलब छैन। नचाहिने प्रदूषित कुरा हामी बोकेर हिँड्दैनौँ। हामीलाई देशको विकास र परिवर्तन गर्नुछ। विरोधका लागि विरोध गर्ने प्रवृत्ति आफै सेलाएर जान्छ। यसमा मजदूर आन्दोलन विगतदेखि नै सचेत छ भन्नेमा म विश्वस्त छु।”

हिमालहरू पग्लिएर मानवीय सभ्यता प्रभावित हुने खतरा रहेको सन्दर्भमा प्रधानमन्त्री ओलीले हिमालदेखि समुद्रसम्मको सुरक्षाको अवधारणासहित विश्व समुदायसँग सहकार्य गर्न आग्रह गरे।

‘सेभ द हिमालय–प्रोटेक्टिङ राइट्स अफ वर्कर्स’ विषयमा विमर्श गरिएको कार्यक्रममा प्रधानमन्त्रीका मुख्य सल्लाहकार एवं जिफन्टका पूर्व अध्यक्ष विष्णुप्रसाद रिमाल, नेकपा (एमाले) को जनसङ्गठन संयन्त्रका प्रमुख भानुभक्त ढकाल, संयुक्त ट्रेड युनियन समन्वय समितिका अध्यक्ष जगत सिंखडा, र अन्तर्राष्ट्रिय श्रम संगठनका नेपालस्थित राष्ट्रिय निर्देशकहरूको सहभागिता थियो।कार्यक्रममा हिमाल आरोही, उद्धारकर्ता र सम्बन्धित संस्थालाई सम्मान गरिएको थियो।