खोज

रूपन्देही, २० फागुन ।

गृहमन्त्री रमेश लेखकले अध्यागमन कार्यालय देशको ऐना भएकाले पर्यटकलाई राम्रो व्यवहार गर्न कर्मचारीलाई निर्देशन दिएका छन्।रूपन्देही जिल्लाको अध्यागमन कार्यालय बेलहियाको उद्घाटन गर्दै गृहमन्त्री लेखकले अध्यागमन कार्यालय भनेको देशको ऐना भएको यहाँ काम गर्ने कर्मचारी सभ्य र मिलनसार हुनु पर्ने बताएका हुन्।

कर्मचारीले जस्तो व्यवहार पर्यटकले त्यसैगरी बुझ्छ। त्यसैले अध्यागमन कार्यालय देशकै ऐना हो। गृहमन्त्री लेखकले भने, “बोल्दा बिनम्र हुनुपर्छ। हाम्रा पर्यटक अतिथी हुन्, नेपालीलाई पनि, बिदेशीलाई पनि हामीले सेवा पुर्याउँदा दिक्क मान्न हुन्न। सभ्यता र विनम्रता पूर्वक ढंगले सेवा दिने हो। कागज नमिले रिसाएर होइन, विनम्रता पूर्वक सेवा दिनुपर्छ, हामी नागरिकका सेवक हौं। सेवाको भावनाले काम गर्नुपर्छ। रिसाउन गलत व्यवहार गर्न कसैलाई छुट छैन।”

अध्यागमन कार्यालयले पहिलो पर्यटकको स्वागत गर्दा राम्रो व्यवहार गर्न कर्मचारीलाई गृहमन्त्रीले निर्देशन समेत दिएका छन्। “तपाईंलाई हेरेर नेपाल बुझ्ने भएकाले राम्रो व्यवहार गर्नुहोस्, १ जनाले सुख पाए २० जनालाई राम्रो भन्छ, नराम्रो भने १ जनाले २० जनालाई नराम्रो प्रभाव पार्छ, त्यसैले पर्यटनको विकास गर्न पनि सबैलाई राम्रो र असल व्यवहार गरौं।” गृहमन्त्री लेखकले भने।

रूपन्देहीको बेलहिया नाका देशकै ठूलो नाका स्थापित भएको बताए। नेपालमा १३ ठाउंबाट बिदेश जाने नाका रहेका छन्। भारत तर्फका ती प्रायः कोरोनाको समयमा बन्द थिए, हाल सुरु भएका गृहमन्त्री रमेश लेखकले बताए। अहिले दक्षिण तिरका नाका सुरु भएका छन्। सबै भन्दा ठूलो नाका हो धार्मिक नाका समेत हो यसको सम्भावना छ। गृहमन्त्री लेखकले भने, “बुद्ध जन्म भूमि भएकाले धेरै मानिस आइरहनुभएको छ। बढी पर्यटक भित्र्याउँछौ। त्यसले मुलुकको आर्थिक विकासमा सहयोग गर्छ।”

अध्यागमन विभागका सहायक निर्देशक टिकाराम ढकालले हालसम्म अध्यागमन विभागले १३ करोड भन्दा बढी राजस्व संकलन गरेको बताउँदै त्रिभुवन विमान स्थल पछि बढी राजस्व संकलन गर्ने कार्यालय अध्यागमन कार्यालय बेलहिया भएको बताए।

सिद्धार्थनगर नगरपालिकाका मेयर इस्तियाक अहमद खांनले लुम्बिनी विकासले पुरै देशको विकास हुने बताए। गौतमबुद्ध अन्तर्राष्ट्रिय विमानस्थलको दिल्ली दैनिक उडान भएमा यस क्षेत्रले र देशले नै आर्थिक र पर्यटन विकासले फड्को मार्ने बताए।
अध्यागमन कार्यालय बेलहियाको भूकम्प प्रतिरोधात्मक ६ तल्ले भवनको गृहमन्त्री लेखकले अनुगमन समेत गरेका थिए।