खोज

भैरहवा, २० फागुन ।
रूपन्देहीको सिद्धार्थनगर नगरपालिकाका प्रमुख (मेयर) इश्तियाक अहमद खाँले भैरहवामा रहेको जिल्ला कारागार स्थानान्तरणका लागि गृहमन्त्री रमेश लेखकसँग संवाद गरेका छन् ।रूपन्देहको जिल्ला कारागार जिल्ला सदरमुकामस्थित सिद्धार्थनगर (भैरहवा) मा छ । घना बस्तीको बीचमा कारागार हुँदा विभिन्न समस्या भएको तथा नगरको सुन्दरतामा समेत नकारात्मक प्रभाव परेको भन्दै मेयर खाँले सोमबार स्थानान्तरण गर्न गृहमन्त्री लेखकसँग आग्रह गरेका हुन् । उनले कारागारको जग्गा नगरपालिकालाई दिनुपर्ने र सोको सट्टा नगरपालिकाले कारागारलाई अन्यत्र जग्गा दिने जानकारी गृहमन्त्री लेखकलाई गराएका थिए ।

जवाफमा गृहमन्त्री लेखकले कारागारको नयाँ बन्ने भवनका लागि बजेटको सुनिश्चितता गरेर स्थानान्तरण गर्ने आश्वासन दिए । मेयर खाँको प्रस्ताव सकारात्मक र समयसापेक्ष रहेको उल्लेख गर्दै उनले भवन निर्माणको लागि आगामी बजेटमा पहल गर्ने जानकारी दिए । भेटपछि मेयर खाँले शहरको बीचबाट कारागार स्थानान्तरण गर्न गृहमन्त्रीसँग सकारात्मक रहेको उल्लेख गर्दै नगरपालिकाले पटखौलिमा ल्याण्डफिल्ड साईटका लागि नगरपालिकाले खरीद गरेको ६ बिगाहा जग्गा कारागारलाई दिन सकिने जानकारी दिए । यसका लागि तत्कालीन गृहमन्त्री बालकृष्ण खाँणको पालामा प्रक्रिया अगाडि बढेको र त्यसलाई मूर्त रूप दिन वर्तमान गृहमन्त्रीसँग आग्रह गरेको उनले बताए ।

ल्याण्डफिल्ड साईटका लागि खरीद गरिएको जग्गामा स्थानीयले अवरोध गरेपछि उक्त योजना अगाडि बढ्न सकेको छैन । हाल नगरपालिकाले फोहोर व्यवस्थापनको लागि निजी क्षेत्रसँग साझेदारी गरी अगाडि बढ्ने गरी प्रस्ताव आह्वान गरेको छ । साझेदारीका लागि दुईवटा फर्मले प्रस्ताव पेश गरेका छन् । अन्तिम सूचना प्रकाशनको लागि कार्यविधि निर्माण भैरहेको र फोहोरको दीर्घकालिक व्यवस्थापन छिट्टै अगाडि बढ्ने पनि मेयर खाँले जानकारी दिए ।