खोज

बुटवल, १७ फागुन । फुटबल खेलको प्रवद्र्धन र खेलाडीलाई प्लेटफर्म दिने गरि सैनामैनामा सुनगाभा सैनामैना गोल्ड कप २०८१ हुने भएको छ । सैनामैना नगरपालिकाको संरक्षकत्व तथा मुर्गिया फुटबल क्लबको आयोजनामा फागुन १९–२८ गते सैनामैना फुटबल रंगशाला मुर्गियामा हुने प्रतियोगिताको तयारी पुरा भएको हो ।

शनिबार पत्रकार सम्मेलन गरि क्लबका अध्यक्ष प्रविन भारीले सुनगाभा पब्लिक स्कुलको मुख्य प्रायोजनमा हुने प्रतियोगिताको सबै तयारी पूरा भएको बताए । प्रतियोगिता आयोजनामा नगरपालिकाबाट ५ लाख रुपैया तथा खेलमैदान मर्मतका लागि थप ५ लाख रुपैया सहयोग भएको उनले बताए । विभिन्न उपसमिति दुई महिनादेखि तयारीमा लागेको उनले बताए ।

कार्यक्रममा खेल संयोजक अशोक खड्काले रुपन्देहीमा तिलोत्तमा गोल्डकप पछिको ठूलो प्रतियोगिताका रुपमा भित्राउन लागेको उनले बताए । अखिल नेपाल फुटबल संघ एन्फाको स्विकृतिमा प्राविधिक उपलब्ध रहेको उनले बताए । प्रतियोगितामा उपाधि विजेताले नगद ७ लाख रुपैया, कप, मेडल, प्रमाणपत्रबाट पुरसकृत गरिने उनले बताए । यसैगरि उपविजेता टिमले नगद ४ लाख रुपैया, कप, मेडल, प्रमाणपत्र तथा विधागत रुपमा उत्कृष्ट खेलाडीहरुलाई समेत नगद, कपबाट पुरसकृत गरिने उनले बताए । प्रतियोगिता सम्पन्न गर्न ६० लाख खर्च हुने अनुमान रहेको भन्दै उनले प्रतियोगितामा खेलाडीहरुलाई १ लाखसम्मको बिमा गरिएको बताए । प्रतियोगितामा एक हजार रुपैयाको सिजनल टिकटबाट ९ दिन नै हेर्न पाउने ब्यवस्था छ । यसैगरि अवलोकनमा ७० वर्षमाथि, अपाङता भएका नागरिकलाई निशुल्क प्रवेशको ब्यवस्था गरिएको छ ।

कार्यक्रममा टिम ब्यवस्थापक श्री दर्लामीले खेललाई रोचक र प्रतिस्प्रर्धात्मक बनाउन प्रत्येक टिममा पाच जना विदेशी खेलाडी खेलाउन पाउने ब्यवस्था भएको बताए । यसले युवा खेलाडीबाट सिक्ने अवसर पनि मिल्ने उनको दाबी छ । आयोजक टिममा पाच जना खेलाडीहरु अनुबन्ध गरिएको र पहिलोपटक आयोजना गरिएको हुदा पनि जित्ने गरि तयार भएको उनले बताए । उद्घाटन खेल आयोजक मुर्गिया फुटबल क्लब र गोर्खा ब्याईज क्लबका बिचमा हुने छ । प्रतियोगितामा ए डिभिजन, विभागिय टिम र एउटा विदेशीसहित १० टिमले भाग लिने उनले बताए ।

कार्यक्रममा सैनामैना नगरपालिका वडा नं ४ का वडाअध्यक्ष रामप्रसाद अधिकारीले खेल विकासमा पालिका विगतबाट नै लागेको बताए । ‘सैनामैना फुटबल रंगशाला निर्माण गरेर खेलगतिविधिलाई जोडेको छ ।’ –उनले भने । आठ करोड रूपैया लागतमा निर्माणधिन रंगशाला करीब ७० प्रतिशत काम भएको उनले बताए । रंगशालाको डिपिआर अनुसारको काम संघ, प्रदेश र स्थानिय सरकारको बजेटबाट निर्माणको क्रममा रहेको उनले बताए । प्रतियोगिता आयोजना गर्न विभिन्न दाताहरुबाट पचास लाख रुपैया सहयोग जुटेको उनले बताए । अब खेललाई ब्यवस्थित गर्नेतर्फ आफुहरु लागेको उनले बताए ।

कार्यक्रममा क्लबका सल्लाहकार चित्र बहादुर केसी, आर्थिक संयोजक गोपाल खड्का, पत्रकार कृष्ण भण्डारीले प्रतियोगिता अवधिभर सबैबाट आआफनो क्षेत्रबाट सहयोग गर्न आग्रह गरे ।