खोज

रौतहट ।

रौतहटको मौलापुर नगरपालिकाद्वारा आयोजित छैटौं मधानी महोत्सवको अवसरमा लागेको मेलामा राम पालको किताब च्यात्दै बेच्नेमाथि कुटपिट गरिएको छ।मेलामा घुमी-घुमी राम पालको किताब च्यात्दै बेच्ने व्यक्तिहरूलाई दिन्दुवादी युवाहरूको समूहले कुटपिट गरेका हुन्।किताब च्यातेपछि राम पालका अनुयायी र युवाहरूबीच झडप हुँदा दुवैतर्फका मानिसलाई चोटपटक लागेको जिल्ला प्रहरी कार्यालय रौतहटका प्रवक्ता डिएसपी दीपककुमार रायले जानकारी दिए।

राम पालका अनुयायीमध्ये एक जनालाई बढी चोटपटक लागेर मौलापुरस्थित एक अस्पतालमा भर्ना गर्नुपरेको थियो। यसका कारण प्रहरीले हिन्दुवादी युवामध्ये एक जनालाई नियन्त्रणमा लिएको थियो।घाइतेको अवस्था सामान्य भएपछि पक्राउ परेका युवकलाई इलाका प्रहरी कार्यालय मौलापुरले जमानीमा छोडेको छ।

त्यसैगरी, महाशिवरात्रिको अवसरमा शिवनगर महादेव स्थानमा लागेको मेलामा राम पालको किताब बेच्ने समूह र युवा समूहबीच घम्साघम्सी भएको थियो।मेलाछेऊ पुलमा दुवै समूहबीच झडप हुने स्थिति भएको थियो। खबर प्राप्त हुनासाथ इलाका प्रहरी कार्यालय शिवनगरबाट गएको टोलीले दुबै समूहलाई धपाउँदा कुटपिट हुनबाट जोगिएको सई बब्लुकान्त झाले बताए।

यौन हिंसालगायत विभिन्न आपराधिक मुद्दामा भारतमा जेल जीवन बिताइरहेका भारतीय नागरिक राम पाललाई उनका अनुयायीले भगवान मानेर किताब बिक्री गरेको र सोझासादा मानिसलाई भ्रममा पारेको भन्दै हिन्दुवादी युवाहरूले प्रदेशभरि विरोध गर्दै आएका छन्। मौलापुरमा पाँच दिने महायज्ञ मेला बिहीबार सम्पन्न भएको थियो।