खोज

बुटवल, १६ फागुन ।

राष्ट्रिय संस्कृतिलाई स्रोतको रुपमा विकास गर्ने लक्ष्यसहित राममणि बहुमुखी क्याम्पसले दुईदिने राष्ट्रिय गोष्ठी आयोजना गर्ने भएको छ ।

यही फागुन १८ र १९ गते मणिग्रामस्थि विश्राम वाटिकामा आयोजना गर्न लागिएको गोष्ठीमा संस्कृतिविद, समाजशास्त्र सम्बन्धी प्राज्ञ लगायत विभिन्न क्षेत्रका विशिष्ट व्यक्तिहरुको सहभागिता रहने छ ।

गोष्ठीबारे जानकारी दिन शुक्रबार आयोजित पत्रकार भेटघाट कार्यक्रममा क्याम्पसमा अनुसन्धान व्यवस्थापन समिति संयोजक डा. अशोक भण्डारीले राष्ट्रिय संस्कृतिलाई बुझ्ने र यसलाई स्रोतको रुपमा अगाडि बढाउने उद्देश्यले गोष्ठीको आयोजना गर्न लागिएको बताए ।

गोष्ठीको पहिलो दिन कि नोट स्पीकरको रुपमा संस्कृतिविद डा. जगमान गुरुङ, त्रिभुवन विश्व विद्यालयका प्राध्यापक डा. कृष्णचन्द्र शर्मा र सहप्राध्यापक टिकाराम गौतमको प्रस्तुती रहने छ ।

त्यसैगरी दोस्रो दिन प्राविधिक सत्र रहने छ भने अनुसन्धानमूलक प्रस्तुति हुने छ, जसमा तीनजना प्यानलिस्ट अर्थशास्त्रका प्राध्यापक डा. बाबुराम ज्ञवाली, प्राध्यापक कपिल लामिछाने र व्यवस्थापनका विज्ञ गणेश पाठकको प्रस्तुति रहने छ ।

गोष्ठीमा प्राज्ञ र स्नातकोत्तर तथा पिएचडी अध्ययनका विद्यार्थीहरुका साथै सरकारी र सामुदायिक क्याम्पसका प्राध्यापक तथा विज्ञहरु सहभागी हुने क्याम्पस प्रमुख ताराप्रसाद पराजुलीले जानकारी दिए ।

क्याम्पस सञ्चालक समितिका अध्यक्ष ध्रुवकुमार धितालले संस्कृतिलाई कसरी आर्थिक पाटोसँग जोड्न सकिन्छ भन्ने कुरालाई गोष्ठीले जोड दिने बताए । गोष्ठीको उदघाटन संघीय सांसद वासुदेव घिमिरेले गर्ने क्याम्पसले जानकारी दिएको छ ।