खोज

बुटवल, १६ फागुन।
नेपाल मगर संघ बुटवल उपमहानगर समितिको आयोजनामा ४३औं मगर दिवसको अवसरमा बुटवलमा भव्य सांस्कृतिक कार्यक्रम गरिएको छ।बुटवल उपमहानगरपालिका वडा नम्बर ८ मा रहेको बाजेबजैठानमा आयोजना गरिएको कार्यक्रमलाई सम्बोधन गर्दै नेपाल मगर संघका केन्द्रीय उपाध्यक्ष गीता सारु मगरले सांस्कृतिक एकताको लागि सबैजनाले आ–आफ्नो ठाउँबाट योगदान दिनुपर्ने बताइन्।उनले कार्यक्रमलाई सम्बोधन गर्दै मगर सांस्कृतिक एकता सँगै मगर पहिचानको समेत सवाल रहेको भन्दै यसको लागि सबै जनाले आ आफ्नो स्थानबाट योगदान दिनुपर्ने बताएकी थिइन्।

बुटवल उपमहानगरपालिकाका प्रमुख खेलराज पाण्डेयले मगर समुदायले आफ्नो सांस्कृतिक पहिचान, एकता सँगै शिक्षा क्षेत्रमा समेत जोड दिनुपर्ने बताए। उनले खासगरी मगर समुदायका मानिसहरूले शिक्षा क्षेत्रमा भन्दा पनि अन्य क्षेत्रमा बढी ध्यान केन्द्रित गरेको हुँदा शिक्षा क्षेत्रमा समेत जोड दिनुपर्ने बताए। उनले शिक्षा क्षेत्रमा मगर समुदायको सहभागीता वृद्धि गरी यदि आर्थी बढ्न सकेको खण्डमा यसले मगर समुदायको आमूल परिवर्तन ल्याउने बताए। उनले भने, “शिक्षाको लागि पढ्न नसक्ने मगर समुदायको लागि आर्थिक सहयोग र छात्रावृत्ति प्रदान गर्न हामी तयार छौं, यसको लागि नगरपालिका तयार छ।” उनले मगर समुदायको शिक्षा, स्वास्थ्य सहितको व्यवस्थापनको लागि तयार रहेको नगर प्रमुख पाण्डेयले बताए।

कार्यक्रममा बुटवल उपमहानगरपालिका उप प्रमुख सावित्रादेवी अर्याल, नगर प्रवक्ता शिव राना सहित नेपाल मगर संघ जिल्ला समिति रूपन्देहीका अध्यक्ष थर्क बहादुर बाह्रघरे मगर लगायतले आ–आफ्नो भनाइ राखेका थिए। कार्यक्रमलाई सम्बोधन गर्दै नेपाल मगर संघ बुटवल नगर समितिका अध्यक्ष बसन्त साठीघरे मगरले मगर सांस्कृतिक एकताको लागि राष्ट्रिय मगर दिवस आफैमा महत्त्वपूर्ण रहेको बताइन्। उनले स्थानीय तहले विदा समेत दिएकोमा धन्यवाद समेत दिईन्।

रूपन्देहीमा करिब दुई लाख मगर समुदायको बसोबास रहेको बताइन्छ। बुटवलमा आयोजना गरिएको कार्यक्रममा भव्यरूपमा मगर समुदायका व्यक्तिहरूको सहभागीता रहेको थियो। कार्यक्रममा मगर खानाका परिकारहरू सहित विविध सांस्कृतिक कार्यक्रम समेत प्रस्तुत गरिएको थियो। नेपाल मगर संघले लुम्बिनी प्रदेशमा मगर भाषालाई सरकारी कामकाजी भाषाको रूपमा मान्यता दिनुपर्ने, विद्यालयहरूमा मगर भाषामा शिक्षाको व्यवस्था गर्नुपर्ने र राज्यका सबै संरचनामा पूर्ण समानुपातिक समावेशी सिद्धान्त लागू गर्नुपर्ने र नेपालका प्रथम शहीद लखन थापा मगरलाई राष्ट्रिय विभूति घोषणा गर्नुपर्ने लगायतका माग राख्दै आएको छ।