खोज

बुटवल, १४ फागुन ।
देशमा घट्दो जनसंख्या नीजि शिक्षालयहरूलाई चुनौती र अवसरका रूपमा रहेको उच्च शिक्षालय तथा माध्यमिक विद्यालय संघ नेपाल (हिसान) का केन्द्रीय अध्यक्ष रमेश कुमार सिलवालले दाबी गरेका छन्। उच्च शिक्षालय तथा माध्यमिक विद्यालय संघ नेपाल (हिसान) रूपन्देहीको १३औं वार्षिकोत्सव तथा साधारण सभाको उद्घाटन गर्दै केन्द्रीय अध्यक्ष सिलवालले मुख्य चुनौतीका रूपमा जनसंख्या घट्नु रहेको भन्दै यसलाई अवसरका रूपमा पनि लिन सकिने बताए।
जनसंख्या कम हुँदा अभिभावक राम्रो शिक्षा दिन चाहने र त्यसमा नीजि शिक्षालयहरूलाई अवसर बन्ने उनले बताए। नेपाल पहिला भन्ने भावना हरेकबाट शुरु गर्नुपर्ने उनले बताए। ‘नेपालमा केही छैन भन्ने भाष्य चिर्न जरुरी छ,’ – उनले भने। सामाजिक सञ्जालहरूमा केही समूह नै नकारात्मक विषय बिक्ने नाममा निरन्तर प्रचारमा लागेको भन्दै उनले यो गलत भएको बताए। सामाजिक सञ्जाल त समुदायका राम्रो विषयलाई ल्याउनुपर्ने उनले सुझाव दिए। नेपालको शैक्षिक अवस्थामा अवसर र चुनौतीहरू रहेको उनले बताए। शैक्षिक विकाससँगै देशका हरेक क्षेत्रमा विकास भएको उदाहरण दिँदै उनले देशका शासकहरूको सोचमा परिवर्तन आउन नसकेको दाबी गरे। ‘राम्रा र ठूलो विद्यालय कसरी निर्माण गर्ने भन्ने मुख्य चुनौती छ,’ – उनले भने।
कार्यक्रममा राष्ट्रिय परीक्षा बोर्ड लुम्बिनी प्रदेशका प्रमुख रमाकान्त तिवारीले हिसानबाट हरेक शैक्षिक गतिविधिमा सहयोग मिलेको स्मरण गर्दै संस्थागत रूपमा नङमासुको आत्मीय सम्बन्ध रहेको बताए। हिसानबाट कठिन समयमा निजी सम्पत्ति लगाएर गुणस्तरीय शिक्षा दिएर विदेश जाने युवा रोक्न निरन्तर लागेको उनले बताए। हिसान र प्याब्सनको आआफ्नो भूमिका रहेको भन्दै शैक्षिक र संस्थागत विकास र संगठनको विकासमा एकताबद्ध भएर जानुपर्ने सुझाव दिए। शैक्षिक गुणस्तरलाई ध्यान दिनुपर्ने बेला आएको उनले बताए। शिक्षालाई सिप, संस्कार, व्यवहारिक रूपमा लागू हुने गरी जोड्न जरुरी रहेको उनले बताए।
कार्यक्रममा हिसान नेपालका केन्द्रीय वरिष्ठ उपाध्यक्ष युवराज शर्माले नेपालमा शैक्षिक संस्थाहरूको हकहितमा लाग्न सुझाव दिए। बागमतीका केही विश्वविद्यालयहरू नीति बनाउने काममा लागेको उनले बताउँदै यो आजको आवश्यकता भएको बताए। पाठ्यक्रम निर्माण गर्न सक्ने, पूर्वाधार विकास गर्न सक्ने विश्वविद्यालयबाट आवश्यक पहलमा जोड दिन आग्रह गरे।
कार्यक्रममा हिसान रूपन्देहीका अध्यक्ष दिनेश भुषालले संस्थाको प्रगति विवरण प्रस्तुत गर्दै हिसानबाट वर्षभरि गरेको कामबारे प्रकाश पारे।कार्यक्रममा अभिभावक संघ रूपन्देहीका अध्यक्ष लोकनाथ ज्ञवाली, प्याब्सन लुम्बिनीका अध्यक्ष लालहरि पाण्डे, हिसान रूपन्देहीका सचिव बाबुराम बन्जाडेले गुणस्तरीय शिक्षामा नीजि शिक्षालयहरूको योगदान र चुनौतीबारे बताए। कार्यक्रममा हिसान रूपन्देहीका सल्लाहकार अनन्तराज शर्मा, टुक बहादुर क्षेत्री, दामोदर शर्मा, प्रो रामचन्द्र आचार्य, लोकनाथ उपाध्यायसहित सिगो जिल्ला कार्यसमितिलाई सम्मान गरिएको थियो।