खोज

काठमाडौँ ।

पाकिस्तान जारी च्याम्पियन्स ट्रफीमा ड्युटीबाट बेपत्ता भएका एक सय प्रहरीलाई सरकारले बर्खास्त गरेको छ। च्याम्पियन्स ट्रफीको समयमा ड्युटीमा अनुपस्थित भएको भन्दै पाकिस्तान सरकारले १०० भन्दा बढी प्रहरीलाई जागिरबाट बर्खास्त गरेको हो।

पञ्जाब पुलिस मातहतका यी प्रहरीहरूले सन् २०२५ को च्याम्पियन्स ट्रफीको सुरक्षाको जिम्मेवारी लिन नचाहेपछि बर्खास्तीमा परेका हुन्। यी प्रहरीहरू पञ्जाब प्रहरीका विभिन्न शाखामा कार्यरत थिए। एक प्रहरी अधिकारीका अनुसार च्याम्पियन्स ट्रफीका क्रममा सयभन्दा बढी प्रहरी धेरै पटक ड्युटीबाट हराएका थिए। धेरै प्रहरीहरूले च्याम्पियन्स ट्रफीको सुरक्षा मामिलामा काम नगर्ने भन्दै स्पष्ट रूपमा अस्वीकार गरेका थिए। जसका कारण उनीहरूलाई जागिरबाट बर्खास्त गरिएको जनाइएको छ।

एक प्रहरी अधिकारीले भने, “यी प्रहरीहरूलाई गद्दाफी स्टेडियमदेखि लाहोरको होटलसम्म टोलीको सुरक्षा गर्न भनिएको थियो तर उनीहरू या त बेपत्ता रहे वा काम गर्न अस्वीकार गरे।” अहिले पञ्जाबका आईजीपी उस्मान अनवरले यस विषयमा कडा कारबाही गर्न आदेश दिएका छन्। अधिकारीले अन्तर्राष्ट्रिय प्रतियोगितामा सुरक्षा लापरवाही सहन नसकिने जनाउँदै कारबाही प्रक्रिया अगाडि बढाइएको हो।

यद्यपि प्रहरीहरूले किन ड्युटी गर्न मानेनन् भन्ने आधिकारिक कारण भने अझै पनि खुलाइएको छैन। तर पाकिस्तानका केही मिडिया रिपोर्टका अनुसार प्रहरीहरूले आफूलाई धेरै काम गर्न लगाइएको गुनासो गरेका छन्।