खोज

ललितपुर, १४ फागुन ।

अधिवक्ता प्रेमसिंह धामीले आफ्नो ज्यान असुरक्षित भएको भन्दै प्रशासनमा निवेदन दिएका छन् । २०४९ सालदेखि कानूनी व्यवसायमा संलग्न भई बहस गर्दै आएका धामीले आफूलाई राम अवालेसमेतका व्यक्तिबाट धम्की आएको भन्दै जिल्ला प्रशासन कार्यालय ललितपुरमा मंगलबार उजुरी दिएका हुन् ।

‘मलाई अपरिचित मानिसहरू कार्यालयमा पठाएर धम्की दिने काम लामो समयदेखि हुँदै आएको थियो, सामान्य होला भनेर चुप बसेको थिएँ, अहिले थप असामान्य गतिविधि हुँदै गए, तसर्थ मैले शान्ति सुरक्षा कायम गरिपाउँ भनी प्रशासनमा निवेदन दिन बाध्य हुनु पर्यो,’ उनले भने ।

यसअघि २०७७ सालको दशैँतिर एक्कासि कार्यालयमा कृष्ण आवालेको नेतृत्वमा श्यामकाजी अवाले, टेकेन्द्र पौडेल, लक्ष्मण पौडेल आएर तैंले हामीलाई चिनेको छैनस्, तँलाई हामी जे पनि गर्न सक्छौं, बुझेर मात्रै कानून व्यवसाय गर्नु भनी धम्की दिएको पनि उनले बताए ।

अधिवक्ता धामीले बक्सिङ संघका केन्द्रीय अध्यक्ष राम अवाले, उपाध्यक्ष श्यामकाजी अवाले, भाइराजा अवाले, कृष्ण अवाले, केदार अवाले, लक्ष्मण पौडेल र टेकेन्द्र पौडेलसमेतबाट धम्की आएको भन्ने उल्लेख गरी प्रशासन कार्यालयमा उजुरी दिएका छन् ।

ललितपुरका सहायक प्रमुख जिल्ला अधिकारी गीता घिमिरेले शान्ति सुरक्षाका लागि माग भई आएकोले जिल्ला प्रहरी कार्यालयमा पत्राचार गरिएको जानकारी दिइन् । ‘दिनमा १०–१२ वटा त शान्ति सुरक्षाकै उजुरीहरू आउने गरेको छ, लेनदेनका विषयमा कुरा नमिल्दा, कतिपय मुद्दाका विषयमा कुरा नमिल्दा पनि यस्ता समस्याहरू निम्तिने गरेका छन्,’ उनले भनिन् ।