काठमाण्डौ।
स्वतन्त्र सांसद डा. अमरेशकुमार सिंहले अहिलेसम्म नेपालमा विदेशी दातृ निकायबाट आएको सहयोगको विवरण सदनलाई जानकारी गराउनुपर्ने माग गरेका छन्।
सोमबार प्रतिनिधि सभाको बैठकमा बोल्दै सांसद सिंहले सरकारले दातृ निकायबाट आएको सहयोग र खर्चको विवरण संसदलाई जानकारी गराउन माग गरेका हुन्।
उनले भने, “कति पैसा धर्मान्तरणमा खर्च भयो, कति जातजात लडाउनेमा खर्च भयो? कति देश टुक्र्याउनेमा लगानी भयो? यो सम्पूर्ण जानकारी राख्ने हक यो सदनले राख्दछ।”
एनजीओहरुलाई मनिटरिङ गर्नुपर्छ भनेर संसदीय समितिबाट निर्णय हुँदै गर्दा तत्कालीन प्रधानमन्त्री शेरबहादुर देउवाले डराएको आरोप सिंहले लगाए। उनले अहिले पनि राष्ट्रिय सदाचार नीति त्यतिकै फालिएको बताए। उनले अहिलेको सरकारलाई कति पैसा एनजीओबाट नेपाल आयो र केमा लगानी भयो भनेर श्वेतपत्र जारी गर्न माग गरे।
